اسلام آباد: پرانے پٹوار نظام کو جدید ڈیجیٹل آن لائن نظام میں تبدیل کرنے کے لیے کڈسٹریل میپنگ کے منصوبے کے تحت سروے آف پاکستان نے جیوگرافک انفارمیشن سسٹم( جی آئی ایس) کا استعمال کرتے ہوئے اسلام آباد کیپٹل ٹیریٹری کی جدید ترین ڈیجیٹل نقشہ سازی کا عمل مکمل کر لیا ہے ۔
نوآبادیاتی دور کے متروک اراضی کے ریکارڈ کے پٹواری نظام کو جدید ڈیجیٹل آن لائن نظام میں تبدیل کرنے کے لیے کڈسٹریل میپنگ کے منصوبے کے تحت سروے آف پاکستان کو کیڈسٹریل میپنگ کا کام سونپا گیا جس کا بنیادی مقصد نقشہ سازی کے موجودہ نظام کو جدید اور ڈیجیٹل فارمیٹ میں تبدیل کرنا ہے۔
اس منصوبہ کے پہلے مرحلہ میں 3 بڑے شہروں کراچی ، لاہور اور اسلام آباد کے ریونیو ریکارڈ کی ڈیجیٹلائزیشن اور ملک کی سرکاری اراضی کاڈیجیٹل ڈیٹا تیارکرنا شامل ہے۔ منصوبے کی کل لاگت 1.994 ارب روپے ہے۔
سروے آف پاکستان کے مطابق اسلام آباد کیپٹل ٹیریٹری کا کل ڈیجیٹائزڈ رقبہ 943 مربع کلومیٹر جس میں 400 مربع کلومیٹر سی ڈی اے اور 543 مربع کلومیٹر کے دیہی علاقے شامل ہیں۔ سی ڈی اے میں کل 70 سیکٹرز اور 63 سوسائٹیاں اور اسلام آباد کیپٹل ٹیریٹری میں 112 موضع جات ڈیجیٹلائزڈ ہیں۔ سروے میں معلوم ہواہے کہ 1512 کنال اراضی پرتجاوزات ہیں۔
مزید خبروں اور اپڈیٹس کے لیے وزٹ کیجئے گرانہ بلاگ۔
