اسلام آباد: 6 ستمبر یوم دفاع پاکستان آج ملک بھر میں قومی جوش وجذبے کے ساتھ منایا جا رہا ہے۔ آج کے دن سن 1965ء میں پاک فوج نے دشمن کے حملے کو پسپا کر کے کامیابی حاصل کی۔ اور وطنِ عزیز کی حفاظت کرتے ہوئے بہادر جوانوں نے جامِ شہادت نوش کیا۔
تفصیلات کے مطابق صدر پاکستان عارف علوی، نگران وزیراعظم انوار الحق کاکڑ، چیئرمین جوائنٹ چیفس آف اسٹاف کمیٹی، سروسز چیف اور افواجِ پاکستان نے شہداء اور ان کے لواحقین کو زبردست خراجِ عقیدت پیش کیا۔
اس حوالے سے صدر پاکستان عارف علوی نے اپنے پیغام میں وطن کے لیے جان کا نذرانہ دینے والوں کو خراجِ تحسین پیش کیا۔ نگران وزیرِاعظم انوار الحق کاکڑ نے یوم دفاع و شہدا پر اپنے پیغام میں کہا کہ ملکی سالمیت اور ترقی کے خلاف ناپاک عزائم ناکام بنانے کیلئے قوم اپنی بہادر افواج کے ساتھ کھڑی ہے۔ محنت اور بہادری سے سکیورٹی اور معاشی چیلنجز سے پاکستان کی حفاظت کریں گے۔
آئی ایس پی آر کا کہنا ہے کہ 6ستمبر کو مادرِ وطن کے بیٹوں نے جانوں کا نذرانہ پیش کر کے پاک سرزمین کا دفاع ناقابلِ تسخیر بنایا۔ آج پوری قوم اُن کی قربانیوں کو سلام پیش کرتی ہے۔ مسلح افواج ہر طرح کے اندرونی و بیرونی خطرات کے خلاف ڈٹ کر کھڑے ہیں۔ اور دفاع وطن کیلئے پرعزم ہیں۔پاکستان کو نقصان پہنچانے کی ہر کوشش کا منہ توڑ جواب دیا جائے گا۔
یوم دفاع اور شہداء کے موقع پر بانی پاکستان قائداعظم محمدعلی جناح کے مزار پر گارڈز کی تبدیلی کی پروقار تقریب منعقد کی گئی۔ تقریب میں پاک فضائیہ کے کیڈٹس نے مزار قائد پر گارڈز کے فرائض سنبھالے۔
مزید خبروں اور اپڈیٹس کیلئے وزٹ کیجئے گرانہ بلاگ
