پاکستان میں حالیہ سیلاب سے تقریباً 3 کروڑ 30 لاکھ افراد متاثر

اسلام آباد: نیشنل فلڈ رسپانس کوآرڈینیشن سینٹر (این ایف آر سی سی) کا کہنا ہے کہ حالیہ سیلاب سے ملک میں تقریباً 3 کروڑ 30 لاکھ افراد متاثر ہوئے ہیں۔

این ایف آر سی سی نے کہا ہے کہ ملک میں حالیہ سیلاب سے ہونے والا نقصان تقریباً 40 ارب ڈالر تک تجاوز کر چکا ہے۔

این ایف آر سی سی کے صدر وفاقی وزیر برائے منصوبہ بندی احسن اقبال کا کہنا تھا کہ سیلاب سے ہونے والے نقصان کا تخمینہ تقریباً 30 سے 40 ارب ڈالر کے درمیان ہے۔

ابتدا میں یہ اندازہ لگایا جا رہا تھا کہ حالیہ سیلاب سے 10 سے 12 ارب ڈالر تک نقصان ہوا۔

ان کا مزید کہنا تھا کہ ورلڈ بینک، ایشین ڈیویلپمنٹ بینک، وفاقی و صوبائی حکومتوں کے تعاون سے سیلاب سے ہونے والے نقصان سے متعلق ایک جامع رپورٹ تیار کی جائے گی۔

وفاقی وزیرِ منصوبہ بندی کا کہنا تھا کہ سندھ میں بنیادی انفراسٹرکچر تباہ ہو چکا ہے۔ بالخصوص پاکستان ریلوے کا مین لائن 1 سکھر تا حیدرآباد سیکشن کی مکمل بحالی کی ضرورت ہے۔ ان کا کہنا تھا کہ اب ایم ایل 1 منصوبے کا آغاز نہایت لازمی ہے۔

وزارتِ خزانہ کی ابتدائی رپورٹ کے مطابق حالیہ سیلاب سے تقریباً 18 ارب ڈالر کا معاشی نقصان ہوا ہے۔ اس وجہ سے ملکی جی ڈی پی بھی سست روی کا شکار ہو کر 1.2 فیصد سے 1.7 فیصد کے درمیان رہے گی۔

سیلاب سے قبل وزارتِ خزانہ کی جانب سے 5 فیصد جی ڈی پی کا ٹارگٹ متعین کیا گیا تھا۔

وزارتِ خزانہ کی جانب سے تجویز دی گئی ہے کہ حکومت کو سیلاب سے متاثرہ علاقوں میں کیش فار ورک پروگرام کا آغاز کرنا چاہیے تاکہ متاثرہ لوگوں کی بحالی عمل میں لائی جا سکے۔ تجویز میں یہ بھی کہا گیا ہے کہ فصلوں اور مویشیوں کے لیے بِلاسود قرض فراہم کیے جانے چاہئیں۔

این ایف آر سی سی کے اجلاس میں اس بات پر زور دیا گیا کہ سڑکوں کے انفراسٹرکچر کی بحالی اور پُلوں کی تعمیر کر کے متاثرہ علاقوں کو دوسرے شہروں سے منسلک کرنا وقت کی اہم ضرورت ہے۔ حالیہ سیلاب میں تقریباً 246 پُل تباہ ہوئے۔

وزارتِ خزانہ کے حکام کے مطابق اگر نقصانات 40 ارب ڈالر سے تجاوز کرتے ہیں تو ملکی جی ڈی پی میں خطرناک حد تک کمی واقع ہو سکتی ہے اور مہنگائی 30 فیصد سے تجاوز کر سکتی ہے۔

رپورٹ کے مطابق صحت کے حوالے سے اب تک 300 سے زائد میڈیکل کیمپ لگائے گئے جن میں ملک بھر میں 120,785 سے زائد مریضوں کا علاج کیا گیا اور مفت ادویات فراہم کی گئیں۔

مزید خبروں اور اپڈیٹس کیلئے وزٹ کیجئے گرانہ بلاگ۔