سکھر تا حیدرآباد موٹروے پبلک پرائیویٹ پارٹنر شپ کے تحت تعمیر کی جائے گی، وزارتِ منصوبہ بندی

اسلام آباد وفاقی سیکرٹری برائے منصوبہ بندی کا کہنا ہے کہ سکھر تا حیدرآباد موٹروے منصوبہ پبلک پرائیویٹ پارٹنر شپ کے تحت تعمیر کیا جائے گا۔

سینیٹ کی سٹینڈنگ کمیٹی برائے پلاننگ اور ڈویلپمنٹ کو بروز جمعہ بریفنگ دیتے ہوئے پلاننگ سیکرٹری نے بتایا کہ 308 ارب روپے کے منصوبے پر حکومت کی جانب سے صرف 8 سے 10 ارب روپے خرچ کیے جائیں گے۔ بقیہ رقم پرائیویٹ سیکٹر کی جانب سے خرچ کی جائے گی۔

سینیٹر عطاء الرحمٰن کی زیرِصدارت ہونے والے اجلاس میں وفاقی سیکرٹری نے کمیٹی کو آگاہ کیا کہ ملک کا کُل ترقیاتی بجٹ 2200 ارب روپے ہے جس میں وفاقی حکومت 700 ارب کی حقدار ہے۔ علاوہ ازیں صوبوں کا حصہ 1500 ارب روپے ہے۔

وفاقی سیکرٹری کا مزید کہنا تھا کہ سی پیک کا منصوبہ روک دیا گیا تھا جوکہ اب شروع کر دیا جائے گا۔

کمیٹی کو بریفنگ دیتے ہوئے سول ایوی ایشن حکام نے بتایا کہ بنوں کے مقابلے میں ڈیرہ اسماعیل خان ائیرپورٹ کی تعمیر کے لیے موزوں مقام ہے۔ حکام کا کہنا تھا کہ ائیرپورٹ کی تعمیر کے لیے موزوں مقام کا فیصلہ کمرشل بنیادوں پر کیا جاتا ہے کہ بڑے ہوائی جہاز ائیرپورٹ کو استعمال کر سکیں۔ ان کا مزید کہنا تھا کہ سوات ائیرپورٹ کے رن وے کی توسیع کا کام بھی جاری ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔