معیاری مٹیریل اور تعمیرات میں اُس کی اہمیت

تعمیرات میں جتنا معیاری مٹیریل استعمال ہو اتنا ہی تعمیر پائیدار ہوتی ہے۔ یہ بھی سچ ہے کہ صرف معیاری مٹیریل ہی نہیں بلکہ اُس کے ساتھ ساتھ انسان کو عمدہ کاریگر اور بہترین پیشہ ور آرکیٹیکٹ کی بھی ضرورت ہوتی ہے تاکہ اچھے مٹیریل کے استعمال کا مکمل فائدہ اٹھایا جا سکے۔

آپ کو معلوم ہے کہ مکان کی تعمیر کرنے کے لیے سب سے پہلے تو زمین کی نوعیت اور سائز کو دیکھنا ہوتا ہے جس کے بعد اُس حساب سے نقشہ نگاری کرنی ہوتی ہے جس کے بعد معیاری مٹیریل کا حصول انسان کی اولین ترجیح ہونی چاہیے۔

یہاں ایک شخص کے پاس دو چوائس ہوتے ہیں یعنی ایک تو یہ کہ وہ کم قیمت پر کم معیار کا مٹیریل خرید سکتا ہے اور دوسری طرف وہ زیادہ پیسوں پر اچھے مٹیریل کا انتخاب کر سکتا ہے۔ یعنی یہاں لاگت اور معیار میں سے کسی ایک پر سمجھوتہ کرنا ہوتا ہے اور یہیں منصوبہ بندی کام آتی ہے کہ انسان اور اس کے بچوں نے جہاں طویل عرصے کے لیے رہنا ہے وہاں وہ تعمیراتی معیار پر کسی قسم کا سمجھوتہ کرنے کو تیار ہے کہ نہیں؟

اگر آپ بھی کسی ایسے دوراہے پر ہیں تو معیاری مٹیریل کے فوائد درج ذیل ہیں۔

 

معیاری مٹیریل کی مدتِ میعاد

معیاری مٹیریل کی جہاں بات آئے وہیں ذہن میں یہ بات سب سے پہلے آتی ہے کہ یہ دیرپا ہوتا ہے اور بہت قوت سے تیار کیا جاتا ہے۔

طویل وقتی تناظر میں اگر دیکھا جائے تو یہی آپ کے پیسے کی بچت کا باعث بنتا ہے۔ اگر آپ اس کے برعکس کم خرچ پر کم معیاری مٹیریل کا انتخاب کرتے ہیں تو تھوڑے ہی عرصے بعد آپ کو شکایات ہوں گی اور ہر تھوڑے عرصے بعد کی مرمت پر آپ کے پیسے کا زیاں ہوگا۔ 

 

بوجھ اٹھانے کی طاقت

کم معیار کے مٹیریل کے مقابلے میں بوجھ اٹھانے اور اپنے وجود کو برقرار رکھنے کی زیادہ طاقت نہیں ہوتی۔

 

 

آپ دیکھیے کہ صرف لوہے کی سلاخیں کئی درجات رکھتی ہیں جس میں قیمت کے لحاظ سے بوجھ اٹھانے اور ایک خاص دورانیے تک چلنے کی سکت ہوتی ہے۔ یہی صورتِ حال بلاکس اور ٹائلز وغیرہ کی بھی ہوتی ہے اور ان کا انتخاب کرتے ہوئے معیار پر توجہ دینی ہوتی ہے۔ یعنی کہا جا سکتا ہے کہ اگر اچھے تعمیری مٹیریل کا انتخاب کیا جائے تو گھر مستحکم رہتے ہیں اور وہ بھی طویل عرصے تک۔

 

بہتر مٹیریل کی تنصیب میں آسانی

معیاری مٹیریل کی ایک خوبی یہ بھی ہے کہ اس کے تیار ہونے میں کم سے کم غلطیاں کی جاتی ہیں اور سائٹ پر مزدور اسے آسانی سے استعمال کر سکتے ہیں۔

 

 

یہ تنصیب میں بھی آسان ہوتے ہیں اور ان کی بحالی اور مرمت بھی آسانی سے ہوسکتی ہے۔ اچھے بلاکس سے بنائی گئی دیواروں میں دراڑیں کم پڑنے کا خدشہ ہوتا ہے اور زلزلے جیسی آفات میں عمارت کے گرنے کا بھی امکان دور دور تک نہیں ہوتا۔

 

موسم کا مقابلہ کرنے کی سکت

معیاری مٹیریل کے استعمال کا ایک اور فائدہ یہ بھی ہے کہ ان میں ہر طرح کی نمی اور خراب موسم سے پیدا ہونے والی مشکلات کا مقابلہ عمدگی سے کرنے کی سکت ہوتی ہے۔

 

 

اچھے اور معیاری لوہے کو زنگ بھی دیر سے لگتا ہے اور مکان کا استحکام کسی صورت خطرے میں نہیں پڑتا۔ آج کل تعمیراتی مٹیریل کو ماحول دوست بنانے پر بھی کافی زور دیا جا رہا ہے یعنی اس کے تیار میں زہریلے مادے کا استعمال نہیں ہوتا اور اس کی بناوٹ کو متعلقہ اداروں سے تصدیق کے بعد اور لیبارٹریز سے گزارنے کے بعد ہی میدان میں لایا جاتا ہے۔ یہ اس صورت میں بھی ماحول دوست ہوتے ہیں کہ یہ گھروں سے توانائی کو ضائع ہونے سے بھی روکتے ہیں۔ 

 

ہر قسم کے خطرات سے پاک وائرنگ

وائرنگ سے متعلق کسی سے بھی بات کرلی جائے تو ہر شخص اس بات پر زور دیگا کہ تمام تر تاریں اور سرکٹس معیاری اور انڈر گراؤنڈ ہونی چاہیے۔

 

 

بجلی کا تانبے سے بہتر کوئی موصل نہیں ہے اور سالہا سال پریشانی سے بچنے کے لیے خالص تانبے کی تاروں کا استعمال کریں۔ وائرنگ کے لیے کوشش کریں کہ کسی ماہر کی خدمات حاصل کی جائیں تاکہ کسی قسم کی کوئی پریشانی نہ اٹھانی پڑے۔

 

مزید خبروں اور اپڈیٹس کے لیے وزٹ کیجئے گرانا بلاگ۔