لاہور: ریکارڈ توڑ پری مون سون بارشیں، انفراسٹرکچر کیلئے خطرناک

لاہور: صوبہ پنجاب کے دارالحکومت لاہور میں مون سون کے آغاز سے قبل ہی موسلادھار ہونے والی بارش نے ریکارڈ توڑ دیا۔

تفصیلات کے مطابق لاہور میں ہونے والی پری مون سون بارش نے گزشتہ تمام ریکارڈ توڑ ڈالے۔ اعداد و شمار سے پتہ چلتا ہے کہ لکشمی چوک میں 256 ملی میٹر پری مون سون بارش ہوئی۔ اس بارش نے 29 جون 2011 کے 98 ملی میٹر کے سابقہ ​​ریکارڈ کو پیچھے چھوڑ دیا۔ اور یہ صوبائی دارالحکومت میں ریکارڈ کی گئی سب سے زیادہ بارش ہے۔ علاوہ ازیں شہر کے دیگر علاقے بھی موسلادھار بارش کی لپیٹ میں رہے۔

شدید بارش سے انڈر پاسز میں پانی جمع ہونے کے باعث پرانے اور نئے تعمیراتی انفراسٹرکچر کے لیے سوالیہ نشان کھڑے ہو گئے۔ نیز سڑکون پر بے تحاشا پانی جمع ہونے کی وجہ سے روز مرہ زندگی مفلوج ہوئی۔ اور ٹریفک کا نظام درہم برہم ہو گیا۔

زیرِ آب آنے والے نشیبی علاقے اور رہائشی کالونیاں خاص طور پر متاثر ہوئیں۔ جس سے رہائشیوں کو تکلیف اور پریشانی کا سامنا کرنا پڑا۔ مزید یہ کہ بہتے ہوئے نالوں اور سیوریج کے نظام نے صورتحال کو مزید خراب کر دیا۔

یاد رہے، محکمہ موسمیات پاکستان نے 25 سے 30 جون تک ملک کے مختلف علاقوں میں آندھی اور گرج چمک کے ساتھ پری مون سون بارشوں کی پیشگوئی کی ہے۔ اور آندھی، گرج چمک اور شدید بارشوں کے باعث کمزور انفرا اسٹرکچر اور بل بورڈز، بجلی کے کھمبے، کمزور چھتیں اور سولر پینل کو نقصان پہنچنے کے خدشے کا اظہار کیا ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔