آر ڈی اے کا ون ونڈو آپریشن سینٹر صارفین کو ایک چھت تلے سہولیات فراہم کر رہا ہے، چیئرمین

راولپنڈی: راولپنڈی ڈویلپمنٹ اتھارٹی (آر ڈی اے) کے چیئرمین طارق محمود مرزا کا کہنا ہے کہ ہمارا ون ونڈو آپریشن سینٹر آر ڈی اے کی تمام سہولیات صارفین کو ایک چھت تلے فراہم کر رہا ہے۔

ان کا کہنا ہے کہ ون ونڈو آپریشن سینٹر میں صارفین کی درخواستوں پر مقررہ وقت کے دوران عملدرآمد کے لئے آر ڈی اے کے 5 ڈائریکٹوریٹس کے الگ الگ کاؤنٹرز بنائے گئے ہیں۔

مقررہ وقت کے سلسلے میں انہوں نے مزید بتایا کہ نقشے کی منظوری اور تعمیراتی تکمیلی سرٹیفکیٹ کے لئے 30 دن کا وقت مقرر کیا گیا ہے۔ زمین کے استعمال کی تبدیلی کی صورت میں این او سی کے حصول کے لئے 45 دن کا وقت مقرر کیا گیا ہے۔ علاوہ ازیں رہائشی منصوبوں کے پرمِٹ کے حصول کے لئے 60 سے 75 دن کا عرصہ مقرر کیا گیا ہے۔

ان کا کہنا تھا کہ ون ونڈو آپریشن کے قیام کا مقصد صارفین کو ایک ہی چھت تلے تمام تر سہولیات کی فراہمی تھا کہ صارفین کو آر ڈی اے کے مختلف دفاتر جانے کے بجائے ایک ہی دفتر سے تمام تر سہولیات کی فراہمی ممکن ہو پائے۔