روشن ڈیجیٹل بینک اکاؤنٹس میں ایک دن میں 7.7 ملین ڈالر کی ریکارڈ رقم جمع

کراچی: اسٹیٹ بینک آف پاکستان نے رپورٹ کیا کہ 9 دسمبر کو روشن ڈیجیٹل بینک اکاؤنٹس میں 7.7 ملین ڈالر کی ریکارڈ رقم جمع کی گئی۔

اسٹیٹ بینک کے مطابق اب تک اِن بینک اکاؤنٹس میں 139.4 ملین ڈالر کی کُل رقم جمع کی گئی ہے۔

نیا پاکستان سرٹیفکیٹس میں بیرونِ ملک مقیم پاکستانیوں کی جانب سے 81 ملین ڈالر کی رقم جمع کی گئی ہے۔

روشن ڈیجیٹل بینک اکاؤنٹ کی سہولت موجودہ حکومت سے ستمبر میں اِس اُمید سے شروع کی تھی کہ اس سہولت سے بیرونِ ملک مقیم پاکستانیوں کی بڑی تعداد مستفید ہوگی۔

روشن ڈیجیٹل بینک اکاؤنٹ نان ریزیڈنٹ پاکستانیز (این آر پی) کو پاکستان میں فنڈز کی منتقلی، بلوں کی ادائیگی اور سرمایہ کاری کرنے کے لیے جدید حل فراہم کرتا ہے۔

اکاؤنٹ ہولڈرز ان ڈیجیٹل اکاؤنٹس کی مدد سے پراپرٹیز کی خرید و فروخت اور دیگر کاروبار کرسکتے ہیں۔

پاکستان کو ترسیلات زر کا 65 فیصد حصہ مشرق وسطی سے موصول ہوتا ہے مگر بینکاروں کی یہ شکایت ہے کہ وہاں کے پاکستانی اتنے پڑھے لکھے نہیں کہ ان اکاؤنٹس کو کھول اور چلا سکیں۔

حال ہی میں گورنر اسٹیٹ بینک رضا باقر نے یہاں کا دورہ کیا تاکہ یہاں مقیم پاکستانیوں میں اِس سہولت کی آگاہی مہم چلائی جا سکے۔

معاشی ماہرین اور بینکاروں کا یہ کہنا ہے کہ روشن ڈیجیٹل بینک اکاؤنٹس کی حقیقی صورت اور افادیت ایک سال کے عرصے تک معلوم ہوگی۔

مزید خبروں اور اپڈیٹس کے لئے وزٹ کیجئے گرانہ بلاگ۔