لاہور: سینئر ممبر بورڈ آف ریونیو اینڈ ریلیف کمشنر پنجاب نبیل جاوید نے پی ڈی ایم اے کے کنٹرول روم کا دورہ کیا۔ اس دوران انہوں نے عمارتوں میں زلزلہ پروف مٹیریل کے استعمال پر زور دیا۔
تفصیلات کے مطابق سینئر ممبر بورڈ آف ریونیو اینڈ ریلیف کمشنر پنجاب نبیل جاوید نے لائن ڈپارٹمنٹس پر زور دیا ہے کہ وہ زلزلہ کی تباہ کاریوں سے بچنے کے لیے نئی تعمیر شدہ عمارتوں میں زلزلہ پروف مٹیریل استعمال کریں۔
پنجاب ڈیزاسٹر مینجمنٹ اتھارٹی (PDMA) کے کنٹرول روم کے دورے کے دوران نبیل جاوید نے انتظامیہ کو بلند و بالا عمارتوں کا معائنہ کرنے اور تعمیرات میں غیر معیاری مٹیریل استعمال کرنے والوں کے خلاف سخت کارروائی کا حکم دیا۔ علاوہ ازیں پی ڈی ایم اے کے ڈی جی عمران قریشی نے ابتدائی رپورٹ فراہم کی جس میں بتایا گیا کہ راولپنڈی میں 9 افراد معمولی زخمی ہوئے تاہم کوئی جانی یا مالی نقصان نہیں ہوا۔
نبیل جاوید نے اضلاع سے درخواست کی کہ قدرتی آفات سے نمٹنے کے لیے دستیاب آلات کی تفصیلات فوری طور پر جمع کرائیں تاکہ روابط کے عمل کو بہتر بنایا جا سکے۔ اور زلزلے کے آفٹر شاکس کے لیے عملے اور مشینری کو الرٹ رکھا جا سکے۔
اس کے علاوہ انہوں نے پی ڈی ایم اے کو پنجاب کے اضلاع سے مسلسل رابطہ برقرار رکھنے کی بھی ہدایت کیں۔
مزید خبروں اور اپڈیٹس کیلئے وزٹ کیجئے گرانہ بلاگ۔
