لاہور: پنجاب حکومت نے سیلاب سے متاثرہ علاقوں کے نقصان کا تخمینہ لگانے کے لیے سروے شروع کرنے کا فیصلہ کر لیا۔
حکام کے مطابق سروے مکمل ہونے کے بعد 27 ستمبر سے سیلاب متاثرین کی بحالی کا کام شروع کیا جائے گا۔
وزیر اعلیٰ پنجاب کی جانب سے قدرتی آفات سے نمٹنے کے لیے وزراء پر مشتمل قائم کی گئی کمیٹی کے اجلاس کے دوران مذکورہ فیصلہ کیا گیا تاکہ موجودہ صورتحال میں ریلیف کی سرگرمیوں کا جائزہ لیا جا سکے۔
اس حوالے سے سِول سیکرٹیریٹ پنجاب میں صوبائی وزیرِ پارلیمانی امور پنجاب محمد بشارت راجہ کی زیرِ صدارت اجلاس منعقد کیا گیا۔
اجلاس کے شرکاء کا کہنا تھا کہ سیلاب سے متاثرہ علاقوں میں موجود افراد کو محفوظ مقامات پر ہجرت کر کے حکومتی مدد سے گھروں کی تعمیر کرنی چاہیے اور رہائش اختیار کرنی چاہیے۔
اس موقع پر ریونیو بورڈ کے سینیئر ممبر زاحد اختر زمان کا کہنا تھا کہ کچھ فلاحی اداروں کی جانب سے سیلاب متاثرین کے لیے گھروں کی تعمیر کی پیشکش کی گئی۔ ان کا کہنا تھا کہ سروے مکمل ہونے کی بعد ریلیف فنڈز کی تقسیم اور گھروں کی تعمیر کا عمل شروع کیا جائے گا۔
اس موقع پر سیلاب متاثرین میں فنڈز کی شفاف تقسیم کے لیے ایکشن پلان پر بھی گفتگو ہوئی۔
اجلاس میں صوبائی وزیرِ پارلیمانی امور پنجاب محمد بشارت راجہ نے پہاڑی علاقوں کے نزدیک ڈیموں کی تعمیر کے لیے فیزایبلٹی رپورٹ طلب کر لی۔ ان کا کہنا تھا وہ افراد جن کی ذاتی زمین پر گھر تعمیر نہ کیا گیا ان کا حکومتی زمین پر گھر تعمیر کیا جائے گا۔
انہوں نے کہا کہ وزیرِ اعلیٰ پنجاب کی ہدایت پر سندھ اور بلوچستان میں میڈیکل ٹیمیں روانہ کر دی گئی ہیں۔
بریفنگ کے دوران اجلاس کے ارکان کو بتایا گیا کہ سیلاب زدگان کے لیے پنجاب حکومت کی جانب سے مزید 25 ہزار ٹینٹ خریدے جا چکے ہیں۔
صوبائی وزیرِ خزانہ محسن لغاری کا کہنا تھا کہ سیلاب کے دوران 60 ہزار گھروں کو نقصان پہنچا اور تقریباً 40 ہزار گھروں کو ٹینٹ پہنچا دیے گئے ہیں۔
ان کا مزید کہنا تھا کہ حکومتِ پنجاب سیلاب متاثرین کے لیے 39 کروڑ روپے کی لاگت سے مزید امدادی سامان خریدنے کی منظوری دینے جا رہی ہے۔
انہوں نے ضلعی انتظامیہ کو ہدایت کی کہ سیلاب سے متاثرہ علاقوں میں متاثرین کو آباد نہ کی جائے۔
اس موقع پر صوبائی وزیرِ زراعت سید حسین جہانیاں گردیزی کا کہنا تھا کہ فصلوں کو ہونے والے نقصان کا جلد از جلد تخمینہ لگا کر کسانوں کو رقوم کی ادائیگیاں ممکن بنائی جائیں۔
مزید خبروں اور اپڈیٹس کیلئے وزٹ کیجئے گرانہ بلاگ۔
