لاہور: چیئرمین پلاننگ اینڈ ڈویلپمنٹ بورڈ عبد اللہ خان سنبل نے کہا ہے کہ پنجاب کے ترقیاتی بجٹ میں 15 فیصد اضافے کے ساتھ مجموعی طور پر 646ارب روپے کی رقم مختص کی گئی ہے۔
ان خیالات کا اظہار انہوں نے پلاننگ اینڈ ڈیویلپمنٹ (پی اینڈ ڈی) کمپلیکس میں میڈیا کے نمائندگان سے ملاقات میں کیا۔ چیئرمین نے صوبہ میں جاری ترقیاتی منصوبوں کے بارے میں میڈیا کو آگاہ کیا گیا۔
ان کا کہنا تھا کہ پی اینڈ ڈی نے تمام محکموں کو فنڈز کے استعمال پر اہداف مقرر کیے ہیں جو رواں ماہ کے دوران 200 ارب روپے تک فنڈز کے استعمال کو یقینی بنائیں گے۔
عبد اللہ خان سنبل نے کہا کہ پنجاب کے ٹوٹل بجٹ کا حجم 560 ارب روپے سے بڑھا کر 646 ارب کیا گیا ہے جس میں سے 170 ارب کے فنڈز مختلف ترقیاتی منصوبہ جات پر خرچ کئے جا چکے ہیں۔
انہوں نے بتایا کہ اس خطیر رقم میں سے 104 ارب روپے صوبے میں جاری اور 49 ارب روپے نئی ترقیاتی اسکیموں پر خرچ کئے گئے ہیں جبکہ صوبے میں اس وقت 4433 نئی اسکیمیں اور تقریبا 3 ہزار سے زائد پہلے سے جاری ترقیاتی منصوبوں پر کام جاری ہے۔
چیئرمین پلاننگ اینڈ ڈویلپمنٹ بورڈ عبد اللہ خان سنبل کا مزید کہنا تھا کہ پی اینڈ ڈی ہیلتھ سیکٹر کو بھی اب تک 60 ارب روپے کے فنڈز جاری کیے جا چکے ہیں۔
مزید خبروں اور اپڈیٹس کیلئے وزٹ کیجئے گرانہ بلاگ۔
