اسلام آباد: وزیرِ اعظم عمران خان نے راوی ریور اربن پراجیکٹ کی عالمی قوانین کے مطابق جلد تکمیل کی ہدایت کردی۔
اُنہوں نے کہا کہ یہ منصوبہ لاہور کے رہنے والوں اور سمندر پار پاکستانیوں کے لیے ایک شاہکار ہوگا۔
وہ ان خیالات کا اظہار لاہور میں راوی ریور اربن ڈیویلپمنٹ پراجیکٹ پر پیش رفت کا جائزہ لیتے ہوئے ایک اجلاس میں کررہے تھے۔
اجلاس میں وزیرِ اعلیٰ عثمان بزدار، معاون خصوصی سید ذوالفقار عباس بُخاری، مشیر وزیر اعظم بیرسٹر شہزاد اکبر، صوبائی وزیر فیاض الحسن چوہان، چیرمین نیا پاکستان ہاؤسنگ اتھارٹی انور علی حیدر اور دیگر حکام نے شرکت کی۔
وزیر اعظم نے تعمیراتی کام کرتے ہوئے ماحولیاتی تحفظ، پانی کی قلت کے مستقل حل اور آبی آلودگی سمیت مختلف پہلوؤں کو مدنظر رکھنے کی ہدایت کی۔
وزیر اعظم نے اطمینان کا اظہار کیا کہ حکومت کی طرف سے پیش کردہ مراعات کے بعد ملک میں تعمیراتی شعبے میں حوصلہ افزا رجحان رہا ہے۔
انہوں نے راوی ریور فرنٹ منصوبے میں غیر ملکی سرمایہ کاری کمپنیوں کی دلچسپی کو بھی سراہا۔
انہوں نے کہا کہ یہ جدید سہولیات سے آراستہ ایک تاریخی تعمیراتی سائٹ ثابت ہوگی۔
وزیر اعظم نے روزانہ کی بنیاد پر اس منصوبے کی نگرانی اور اس پر عمل درآمد آسان طریقے سے عمل میں لانے کے لئے انتظامی رکاوٹوں کو دور کرنے کی ہدایت جاری کی۔
مزید خبروں اور اپڈیٹس کے لیے وزٹ کیجئے گرانا بلاگ۔
