وزیرِ اعظم نے راوی ریور اربن ڈویلپمنٹ اتھارٹی کا افتتاح کردیا

لاہور: وزیرِ اعظم عمران خان نے راوی ریور اربن ڈیویلپمنٹ اتھارٹی کا افتتاح کردیا۔

افتتاحی تقریب سے خطاب کرتے ہوئے انہوں نے کہا کہ اسلام آباد کے بعد یہ نیا شہر بنانے کا دوسرا پراجیکٹ ہوگا اور اس پراجیکٹ سے لاہور کو بہت فائدہ ہوگا کہ جس کی نہ صرف آلودگی کم ہوگی بلکہ مستقبل کی رہائشی ضروریات بھی پوری ہوں گی۔

اُن کا کہنا تھا کہ اس سے لوگوں کے لیے روزگار کے نئے مواقع پیدا ہوں گے اور یہ پراجیکٹ اوور سیز پاکستانیوں کے لیے سرمایہ کاری کے نئے آپشنز پیدا کریگا۔

انہوں نے یہ بھی کہا کہ کوشش یہ ہوگی کہ جو پیسہ پاکستان میں ہے وہ اس پراجیکٹ کے لیے استعمال میں لایا جا سکے۔

وزیرِ اعظم عمران خان کی زیر صدارت قومی رابطہ کمیٹی برائے ہاؤسنگ و تعمیرات کا بھی اجلاس ہوا کہ جس میں انہوں نے پنجاب کے سول افسران سے ویڈیو لنک پر خطاب کیا۔ اس اجلاس میں صوبائی محکموں کے سیکرٹریز، ڈپٹی کمشنرز، کمشنرز اور ریجنل پولیس افسران نے شرکت کی۔

اجلاس میں وزیرِ اعلیٰ پنجاب، چیف سیکرٹری پنجاب اور آئ جی پنجاب بھی شریک ہوئے۔

اجلاس میں وفاقی وزیرِ اطلاعات شبلی فراز، وزیرِ صنعت و پیداوار حماد اظہر، مشیر وزیراعظم مرزا شہزاد اکبر، چیرمین نیا پاکستان ہاؤسنگ و ڈویلپمنٹ اتھارٹی لیفٹینٹ جنرل (ر) انور علی، گورنر اسٹیٹ بینک رضا باقر بھی موجود تھے۔ 

علاوہ ازیں سندھ، خیبر پختونخوا، بلوچستان، آزاد جموں و کشمیر اور گلگت بلتستان کے چیف سیکریٹریز نے بھی ویڈیو لنک کے ذریعے شرکت کی۔

وزیرِ اعظم کو چیف سیکریٹری سندھ اور خیبر پختونخوا کی جانب سے عوامی سہولت کے لیے فعال ون ونڈو پورٹل کے حوالے سے بریفنگ دی گئی۔ اُنہیں بتایا گیا کہ اس پورٹل کے اجراء کے بعد سے انسانی مداخلت کم ہوگئی ہے اور آسانی سے درخواستوں پر پیش رفت کا پتہ چل سکتا ہے۔

وزیرِ اعظم عمران خان نے تعمیراتی صنعت ملکی ترقی کے لیے اہم ترین قرار دیتے ہوئے کہا کہ اسی صنعت سے متعدد روزگار کے مواقع پیدا ہوں گے۔

وزیر اعظم نے تعمیرات کے شعبے میں سرمایہ کاری کرنے والوں کو ہر ممکن آسانی دینے پر زور دیا تاکہ زیادہ سے زیادہ لوگ اس شعبے میں دی گئی مراعات سے فائدہ اٹھا سکیں۔

مزید خبروں اور اپڈیٹس کے لیے وزٹ کیجئے گرانا بلاگ۔