پشاور: درخواست گزار کی جائیداد کا ’فرد‘ روکنے پر پٹواری پہ 10 ہزار روپے جرمانہ عائد

پشاور: ڈسٹرکٹ نوشہرہ کے رہائشی میاں نور زیب شاہ کی جانب سے درج کرائی گئی شکایت کے جواب میں رائٹ ٹو پبلک سروسز کمیشن نے اسماعیل خیل میں ایک پٹواری کے خلاف کارروائی کی ہے۔

تفصیلات کے مطابق شکایت کنندہ کو اپنی جائیداد کا ‘فرد’ حاصل کرنے میں مشکلات کا سامنا کرنے پر کمیشن نے ڈپٹی کمشنر نوشہرہ کو مسئلہ حل کرنے کی ہدایت کی۔

کمیشن کی ہدایت پر ڈپٹی کمشنر نوشہرہ نے ایکشن لیتے ہوئے موضع داغ اسماعیل خیل کے پٹواری پر عمدرآمد میں ناکامی اور غفلت برتنے کے باعث 10 ہزار روپے جرمانہ عائد کیا۔

علاوہ ازیں، جرمانے پر عملدرآمد کو یقینی بنانے کے لیے ڈپٹی کمشنر نے ڈسٹرکٹ اکاؤنٹس آفیسر نوشہرہ کو متعلقہ پٹواری کی ماہانہ تنخواہ سے جرمانے کی کٹوتی کے احکامات جاری کیے ہیں۔ نیز رائٹ ٹو پبلک سروسز کمیشن کے چیف کمشنر محمد سلیم خان نے ڈپٹی کمشنر کی جانب سے اٹھائے گئے فوری اقدام کو سراہا۔ انہوں نے ضلعی افسران کو ان کے ماتحت عملے کی غفلت پر جوابدہ ٹھہرانے کی اہمیت کا بھی اظہار کیا، کیونکہ یہ بالآخر عوام کے لیے خدمات کی بہتر رسائی کا باعث بنے گا۔

واضح رہے کہ پراپرٹی کے معاملات میں ’’فرد‘‘ سے مراد وہ قانونی دستاویز ہے، جو جائیداد کی ملکیت کا ثبوت ہوتا ہے۔ یہ عام طور پر جائیداد کی رجسٹریشن کے لیے درکار ہوتی ہے، جسے عام فہم زبان میں رجسٹری بھی کہا جاتا ہے۔ اس سے تصدیق ہوتی ہے جائیداد فروخت کرنے والے کی ہے۔ اور اسے پراپرٹی رجسٹریشن آفس سے حاصل کیا جاتا ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔