اسلام آباد: چین کی جنرل ایڈمنسٹریشن آف کسٹمز کے جاری کیے گئے اعداد و شمار کے مطابق چین کو پاکستان کی برامدات رواں سال کے پہلے سات ماہ میں دو ارب انیس کروڑ ڈالر سے تجاوز کر گئیں جو کہ گزشتہ سال کے مقابلے میں 11.14 فیصد زیادہ ہیں۔
چین میں پاکستانی سفارتخانے کے کمرشل قونصلر غلام قادر نے چائنہ اکنامک نیٹ کو بتایا کہ جولائی کے مہینے میں دیگر ممالک کے ساتھ تجارت میں کمی کے بعد بھی چین کو پاکستان کی برآمدات میں اضافہ ہوا۔
انکا کہنا تھا کہ یہ بہت امید افزا ہے کہ چین کو پاکستان کی برآمدات بڑھ رہی ہیں۔ غلام قادر نے مزید کہا کہ حکومتِ پاکستان ویلیو ایڈیشن، ڈیجیٹل مارکیٹنگ اور ایکسپورٹ پر مبنی سرمایہ کاری کے فروغ کی خواہش مند ہے۔ اس مقصد کے لیے حکومتِ پاکستان دونوں ممالک کے کاروباری اداروں کی حوصلہ افزائی کے ذریعے برآمدات کی حقیقی صلاحیت کو بروئے کار لانا چاہتی ہے۔
اعداد و شمار کے مطابق جولائی کے مہینے میں پاکستان کی چین کو برآمدات سالانہ بنیادوں پر تقریباً 13 فیصد بڑھ کر ستائیس کروڑ ڈالر سے تجاوز کر گئیں۔ جب کہ گزشتہ سال کے اسی مہینے میں یہ چوبیس کروڑ ڈالر تھیں۔
مجموعی طور پر جنوری سے جولائی 2022 تک چین کی پاکستان سے درآمدات اور برآمدات بڑھ کر 16 ارب 73 کروڑ ڈالر ہو گئیں جو کہ گزشتہ سال کی نسبت 13.51 فیصد زیادہ ہے۔
چین اور پاکستان کے درمیان تجارت کا مجموعی حجم جولائی کے مہینے میں تقریباً 8 فیصد بڑھ کر 2 ارب 35 کروڑ ڈالر ہو گیا جو کہ 2021 کے اسی مہینے میں دو ارب 18 کروڑ ڈالر تھا۔
مزید خبروں اور اپڈیٹس کیلئے وزٹ کیجئے گرانہ بلاگ۔
