پاکستان چین کو چار ارب ڈالر کی برآمدات کا ہدف حاصل کرنے میں پُرعزم

اسلام آباد/بیجنگ: چین میں متعین پاکستانی سفیر معین الحق نے کہا ہے کہ  رواں سال کے پہلے سات ماہ میں پاکستان کی چین کو برآمدات میں غیر یقنی حد تک اضافہ ہوا ہے اور اگر یہی تسلسل رہا تو پاکستان 4 ارب ڈالر کے ہدف کو عبور کرنے میں کامیاب ہو سکتا ہے۔

انہوں نے بیجنگ میں تاجروں کے ایک گروپ سے گفتگو کرتے ہوئے کہا کہ چین کو ہماری برآمدات گذشتہ برس ریکارڈ اضافے کے ساتھ 3 ارب  60 کروڑ  ڈالر رہیں اور اس رفتار کے ساتھ اس سال ہم چار ارب ڈالر کا ہدف عبور کر لیں گے۔

معین الحق نے تاجروں پر زور دیا کہ وہ پاکستان سے چین کو برآمدات کو مزید بڑھانے کے لیے حکومتِ پاکستان اور سفارت خانے کے ساتھ مل کر کام کریں۔

انہوں نے مزید کہا کہ پاکستانی سفارت خانے نے چینی خریداروں اور صارفین کو پاکستانی مصنوعات کے بارے میں آگاہی فراہم کرنے کے لیے پہلے ہی مختلف شہروں میں پاکستان پویلین قائم کر رکھے ہیں اور چین میں پاکستانی مصنوعات کی فروخت کے لیے جے ڈی ڈاٹ کام  جیسے آن لائن پلیٹ فارم کا استعمال بھی کر رہے ہیں۔

انہوں نے بتایا کہ جلد ہی دیگر مقبول آن لائن پلیٹ فارمز کے ساتھ معاہدوں پر دستخط کیے جائیں گے تاکہ چینی آن لائن مارکیٹ جو کہ دنیا کی سب سے بڑی ای کامرس مارکیٹ ہے، پاکستانی مصنوعات کو فروغ دینے میں ان کا تعاون حاصل کیا جا سکے۔

پاکستانی سفیر کا مزید کہنا تھا کہ چین کی درآمدی دوستانہ پالیسیوں کے پیشِ نظر پاکستانی کاروباری ادارے پاکستانی اشیاء کی فروخت کے لیے آف لائن اور آن لائن پلیٹ فارمز سے فائدہ اٹھا سکتے ہیں۔

جولائی کے مہینے میں دوسرے ممالک کے ساتھ تجارت میں کمی کے باوجود چین کو پاکستان کی برآمدات میں اضافہ ریکارڈ کیا گیا۔