این ایف آر سی سی کا کہنا ہے کہ گذشتہ 24 گھنٹوں کے دوران 18 جہازوں کے ذریعے سیلاب زدگان میں 32.88 ٹن خوراک تقسیم کی گئی اور 87 افراد کی جان بچائی گئی۔
این ایف آر سی سی کی تازہ ترین رپورٹ کے مطابق سندھ کے جنوبی اور مشرقی کے علاقے، مشرقی بلوچستان، کشمیر، بالائی خیبرپختونخواہ میں گذشتہ 24 گھنٹوں کے دوران موسلا دھار بارش ہوئی جبکہ ملک کے باقی علاقوں میں گرمی کی شدت برقرار رہی۔
تازہ ترین رپورٹ کے مطابق گذشتہ 24 گھنٹوں کے دوران ہونے والی بارشوں سے انفراسٹرکچر کے حوالے سے کسی قسم کا نقصان نہیں ہوا۔ اس سے قبل بارشوں سے آنے والے سیلاب کے باعث 12 ہزار 418 کلومیٹر پر محیط سڑکیں اور 390 پُل تباہ ہوئے۔
این ایف آر سی سی کا کہنا ہے کہ سیلابی صورتحال کے آغاز سے لے کر اب تک آرمی ایوی ایشن کے ہیلی کاپٹر 516 پروازوں کے دوران 4570 افراد کی جان بچا چکے ہیں۔
این ایف آر سی سی حکام کے مطابق ملک بھر میں اب تک 147 ریلیف کیمپ، 300 سے زائد میڈیکل کیمپ اور 278 امدادی سامان اکٹھا کرنے کے کیمپس لگائے گئے ہیں۔ ان میڈیکل کیمپس میں اب تک 1 لاکھ 25 ہزار 506 افراد کا علاج ہو چکا ہے جبکہ مریضوں کو 5 دن کی ادویات فراہم کی جا رہی ہیں۔
این ایف آر سی سی کی رپورٹ کے مطابق امدادی سامان اکٹھا کرنے کے لیے لگائے گئے کیمپس میں 8281 ٹن سے زائد امدادی سامان اکٹھا کیا چکا ہے جبکہ 7940.6 ٹن سامان سیلاب زدگان میں تقسیم کیا جا چکا ہے۔ علاوہ ازیں 74 لاکھ ادویات بھی اکٹھی کی جا چکی ہیں جن میں سے 72 لاکھ ادویات سیلاب زدگان میں تقسیم کی جا چکی ہیں۔
نیشنل فلڈ رسپانس کوآرڈینیشن سینٹر کا کہنا ہے کہ ترکی کی جانب سے 4 ہزار 8 ٹن خوراک کے پیکٹ، 1 ہزار بچوں کی خوراک کے پیکٹ، 460 ٹینٹ، 2000 کچن سیٹ، 50 بیڈ، 50 کشتیاں، 1 ہزار حفظانِ صحت کے ڈبے، 2.63 ٹن اشیائے خورونوش اور 15.6 ٹن کی ادویات سیلاب زدگان کی امداد کے لیے پاکستان بھیجی جا چکی ہیں۔
متحدہ عرب امارات کی جانب سے 31 ٹن کھانے پینے کی اشیاء، 21 ہزار 2 سو 45 کھانے کے پیکٹ، 1 ہزار ٹینٹ، 1 ہزار بیڈ، 6.9 ٹن ادویات اور 82.5 ٹن کی خشک خوراک پاکستان بھیجی جا چکی ہے۔ جبکہ چین کی جانب سے 5 ہزار 7 سو 19 ٹینٹ سیلاب زدگان کی امداد کے لیے بھیجے جا چکے ہیں۔
این ایف آر سی سی کی رپورٹ میں جاری کردہ اعداد و شمار کے مطابق بیلجیئم کی جانب سے 300 ٹینٹ، جاپان کی طرف سے 700 ٹینٹ اور 306 بیڈ جبکہ ازبکستان کی جانب سے 25 ٹن کھانے پینے کا سامان اور 9 ٹن بیڈ عطیہ کیے گئے۔
قطر کی جانب سے 5 ٹن ادویات، 291 تکیے اور 3 سو کمبل جبکہ امریکہ نے 14 ہزار 4 سو 60 کچن سیٹ اور 2 ہزار 8 سو 80 پلاسٹک شیٹس عطیہ کیں۔
این ایف آر سی سی کے رپورٹ کے مطابق فرانس نے 204 ٹینٹ، 208 کچن سیٹ، 422 میڈیکل باکس، 78 واٹر پمپس، 70 موٹر پمپس اور 1 ہزار 1 سو 25 بیڈ عطیہ کیے۔
مزید خبروں اور اپڈیٹس کیلئے وزٹ کیجئے گرانہ بلاگ۔
