اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) نے سیکیورٹی انتظامات کی بہتری کے پیشِ نظر ڈپلومیٹک انکلیو اور اس کے توسیعی علاقے کو آپس میں ملانے کے لیے نئی سڑک تعمیر کرنے کا فیصلہ کر لیا۔
سی ڈی اے حکام کے مطابق پرانا ڈپلومیٹک انکلیو مکمل طور پر محفوظ علاقہ ہے، تاہم انکلیو اور اس سے ملحقہ علاقے کے درمیان تھرڈ ایونیو پر ایک سڑک ہے جسے مقامی افراد اور عام لوگ اکثر استعمال کرتے ہیں۔
حکام نے بتایا کہ سڑک کے دوسری طرف ایک دوست ملک کا سفارت خانہ موجود ہے اس لیے حکومت نے بہتر سیکیورٹی انتظامات کے لیے دونوں علاقوں کو ملانے کا فیصلہ کیا۔
اس مقصد کے لیے تھرڈ ایوینیو کو مستقل طور پر بند نہیں کیا جائے گا لیکن محدود ٹریفک کی اجازت ہوگی۔ تاہم انہوں نے کہا کہ اکثر مسافروں جیسے یونیورسٹی کے طلباء، بری امام کے زائرین، بری امام اور دیگر ملحقہ علاقوں میں رہائش پذیر افراد کو متبادل سڑک فراہم کی جائے گی۔
انہوں نے کہا کہ مذکورہ سفارت خانے کے ایک طرف سے 3 کلومیٹر متبادل سڑک گزرے گی۔ اس حوالے سے سڑک کے ڈیزائن کو حتمی شکل دی جا رہی ہے۔
سی ڈی حکام کا کہنا ہے کہ سڑک کا ڈیزائن مکمل ہونے کے بعد ٹینڈر طلب کرنے سے قبل مجوزہ منصوبے کے پی سی ون کی منظوری لی جائے گی۔ یہ منصوبہ چند ماہ میں مکمل ہو جانے کا امکان ہے۔
مزید خبروں اور اپڈیٹس کیلئے وزٹ کیجئے گرانہ بلاگ۔
