نادرا سروسز آپ کے دروازے پر، نئی بائیکر سروس کا افتتاح کر دیا گیا

اسلام آباد: نادرا کی جانب سے صارفین کے لیے خوشخبری، شناختی کارڈ بنوانے یا اپڈیٹ کروانے کے لیے بائیکر سروس کا افتتاح کر دیا گیا۔

وفاقی وزیرِ داخلہ رانا ثناء اللہ نے نادرا بائیکر سروس کا افتتاح کیا۔ افتتاحی تقریب نادرا ہیڈکوارٹرز اسلام آباد میں منعقد کی گئی۔

نادرا حکام کا کہنا ہے کہ نئی بائیکر سروس شناختی کارڈ بنوانے، رینیو کروانے یا اس میں کوئی بھی تبدیلی کروانے کے لیے صارفین کو ان کے گھر پر خدمات فراہم کرے گی۔

چئیرمین نادرا محمد طارق ملک کا کہنا تھا کہ ابتدائی مرحلے میں یہ سروس راولپنڈی اور اسلام آباد کے رہائشیوں کے لیے شروع کی جائے گی جس کا دائرہ کار بعد رواں سال کے آخر تک پورے ملک کے اضلاع میں پھیلا دیا جائے گا۔

انہوں نے بتایا کہ نادرا بائیکر سروس ایک پورٹیبل سروس ہے جو صارفین کو ان کے گھر کی حدود میں سروسز فراہم کرے گی۔ اس سروس میں خواتین رجسٹریشن آفیسرز کو بھی شامل کیا جائے گا جو بالخصوص خواتین کو نادرا سروسز فراہم کریں گی۔ اس سروس سے صارفین کو نادرا سینٹر آنے کی زحمت نہیں اٹھانا پڑے گی۔

چئیرمین نادرا محمد طارق ملک نے وفاقی وزیرِ داخلہ کو بریفنگ دیتے ہوئے بتایا کہ حالیہ سیلاب نے سندھ، بلوچستان اور جنوبی پنجاب میں نادرا کے دفاتر کو بری طرح متاثر کیا ہے جس کے باعث ان علاقوں میں نادرا کے آپریشنز بھی متاثر ہوئے ہیں۔

ان کا کہنا تھا کہ سیلاب کے باعث 3 کروڑ 70 لاکھ افراد متاثر ہوئے ہیں جس کی وجہ سے مخصوص علاقوں میں کئی افراد شناختی کارڈ بھی کھو چکے ہیں۔ جبکہ عوامی ریلیف کے لیے کیے جانے والے حکومتی اقدامات سے مستفید ہونے کے لیے شناختی کارڈ ایک اہم ضرورت ہے۔

اس سروس سے مستفید ہونے کے لیے صارفین نادرا کی سرکاری ویب سائٹ، موبائل ایپلیکیشن یا پھر کال سینٹر سے اپنی اپائنٹمنٹ بُک کر سکتے ہیں۔

مزید خبروں اور اپڈیٹس کیلئے وزٹ کیجئے گرانہ بلاگ۔