میاواکی شجر کاری مہم کا اسلام آباد کے سیکٹر ایچ بارہ میں باقاعدہ آغاز

وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) نے اسلام آباد کے سیکٹر ایچ بارہ میں میاواکی جنگل کے منصوبے کا افتتاح کر دیا۔

حکام کے مطابق چیئرمین سی ڈی اے کیپٹن (ر) محمد عثمان یونس اور منیجنگ ڈائریکٹر ماڑی پیٹرولیم فہیم حیدر نے منصوبے کا افتتاح کیا۔

سی ڈی اے کے مطابق یہ جنگل 17 ایکڑ اراضی پر بنایا گیا ہے۔ ابتدائی طور پر مختلف انواع کے 20,000 بڑے سائز کے پودے لگائے جا چکے ہیں جب کہ مزید شجرکاری جنگل کو مزید توسیع دی جائے گی۔ علاوہ ازیں پودوں کی حفاظت کے لیے خصوصی باڑ بھی لگائی گئی ہے۔

اس موقع پر خطاب کرتے ہوئے سی ڈی اے کے چیئرمین نے ایم پی سی ایل کا سی ڈی اے کے ساتھ جنگل بنانے کے لیے شراکت داری پر شکریہ ادا کیا۔ انہوں نے کہا کہ اسلام آباد پہلے ہی ایک سرسبز شہر ہے اور 20 ہزار پودوں کے اضافے سے شہر مزید سرسبز ہو جائے گا۔

سی ڈی اے چیئرمین کا مزید کہنا تھا کہ ماحولیاتی آلودگی کے پیش نظر لگائے جانے والے پودے کم ہیں تاہم سی ڈی اے انتظامیہ مزید پودے لگانے کی کوشش کر رہی ہے۔

ان کا کہنا تھا کہ یہ اسلام آباد شہر کا سب سے بڑا میاواکی جنگل ہے، اس لیے پودوں کی حفاظت کو یقینی بنانے کے لیے خصوصی انتظامات کیے جائیں گے۔

میاواکی جنگل درخت لگانے کا ایک طریقہ ہے جسے جاپانی ماہر نباتات اور پودوں کی ماحولیات کے ماہر اکیرا میاواکی نے متعارف کرایا تھا۔

اس طریقہ کار میں، درخت ایک دوسرے کے قریب لگائے جاتے ہیں اور ابتدائی دور میں پودے جگہ اور روشنی اور پانی تک رسائی کے لیے ایک دوسرے سے مقابلہ کرتے ہیں، اس جدوجہد کے نتیجے میں تیزی سے نشوونما ہوتی ہے۔

اس طریقہ کار کے تحت پودوں 10 گنا زیادہ تیزی سے اگتے ہیں۔

گزشتہ سال سی ڈی اے نے شہر کے مختلف علاقوں میں ایسے متعدد جنگلات لگائے تھے۔

مزید خبروں اور اپڈیٹس کیلئے وزٹ کیجئے گرانہ بلاگ۔