اسلام آباد: شہرِ اقتدار کے دیرینہ مسائل کے حل کے لیے کیپیٹل ڈیویلپمنٹ اتھارٹی نے لائٹ اپ اسلام آباد مہم کا آغاز کردیا۔
اس مہم کے تمام تر اقدامات سی ڈی اے کے ممبر فنانس رانا شکیل کی زیرِ نگرانی ہورہے ہیں۔
اس ضمن میں پچھلے 8 دنوں میں شہر کے مختلف حصوں سے 5200 ٹن کچرا اٹھا لیا گیا۔
تفصیلات کے مطابق دو ہزار ٹن کوڑا کرکٹ صرف بارہ کہو کے علاقے سے نکالا گیا ہے۔
اس سے قبل اسلام آباد سے روزانہ اوسطاً 500 ٹن سے کم کچرا جمع ہوتا تھا جو کہ اب یومیہ 650 ٹن سے زائد جمع ہوتا ہے۔
یہ قابل قدر اضافہ سی ڈی اے انتظامیہ کے بہتر انتظامی کنٹرول اور نگرانی کی وجہ سے ممکن ہوا ہے۔
علاوہ ازیں کیپیٹل ڈویلپمنٹ اتھارٹی کی زیرِ نگرانی پی ڈبلیو ڈی انڈر پاس کی تعمیر کا کام بھی تیزی سے آگے بڑھ رہا ہے۔
چیرمین سی ڈی اے کی ہدایات پر تعمیراتی مشینری کو کچھ دن پہلے تعمیراتی مقام پر منتقل کیا گیا تھا اور اب پوری تیزی کے ساتھ کھدائی کا کام جاری ہے۔
چیئرمین سی ڈی اے اس منصوبے کی جلد تکمیل کو یقینی بنانے کے لئے جاری پیشرفت کی مسلسل نگرانی کر رہے ہیں۔
پی ڈبلیو ڈی انڈر پاس کی تعمیر اسلام آباد میں طویل نظرانداز رہائشی شعبوں کی ترقی کے لئے موجودہ سی ڈی اے انتظامیہ کی جامع حکمت عملی کا حصہ ہے۔
حال ہی میں سی ڈی اے کو ایم سی آئی کے چار ڈائریکٹوریٹس کا انتظام سونپا گیا ہے جس کے بعد انوائرنمنٹ، صفائی، روڈ نیٹ ورک، سٹریٹ لائٹس اور واٹر سپلائی کی سروسز میں تیزی دیکھنے میں آئی ہے۔
مزید خبروں اور اپڈیٹس کے لئے وزٹ کیجئے گرانہ بلاگ۔
