لاہور: لاہور ڈویلپمنٹ اتھارٹی (ایل ڈی اے) کی کارکردگی کا جائزہ اجلاس منعقد ہوا۔ ایل ڈی اے کی ٹاؤن پلاننگ اور سی ایم پی ونگز کی کارکردگی کا جائزہ لیا گیا۔ اجلاس میں بتایا گیا کہ رواں مالی سال کے پہلے تین ماہ کے دوران واجبات کی وصولی میں 300 فیصد کا غیر معمولی اضافہ ہوا ہے۔
تفصیلات کے مطابق کمشنر اور ڈی جی ایل ڈی اے محمد علی رندھاوا نے بدھ کے روز ایل ڈی اے کے ٹاؤن پلاننگ اور سی ایم پی ونگز کی کارکردگی کا جائزہ لیا۔ بتایا گیا کہ رواں مالی سال کے پہلے تین مہینوں میں گزشتہ مالی سال کے اسی عرصے کے مقابلے میں 300 فیصد اضافہ ہوا ہے۔ رواں سال کی پہلی سہ ماہی میں 3 ارب روپے جمع کیے گئے جو گزشتہ مالی سال کے اسی عرصے میں 700 ملین روپے تھے۔
محمد علی رندھاوا نے کہا کہ دو چیف ٹاؤن پلانرز کی تقرری کے بعد ٹاؤن پلاننگ کی کارکردگی میں خاطر خواہ بہتری آئی ہے۔ اور خدمات کی فراہمی میں مزید بہتری کے لیے دونوں محکموں کو ٹاسک تفویض کیے گئے ہیں۔ نیز کمشنر نے بلڈنگ پلانز کی منظوری کے لیے ایس او پیز کو آسان بنانے اور شہریوں کی سہولت کے لیے تین، پانچ، دس مرلہ اور کنال کے پلاٹوں کے نقشے فراہم کرنے کی ہدایات کیں۔
مزید یہ کہ اجلاس میں انہوں نے نقشوں کی منظوری میں ملوث ایجنٹس اور مافیا کو فوری بلیک لسٹ کرنے کا حکم دیا۔ انہوں نے ایل ڈی اے ون ونڈو میں این او سی کی منظوری کی سہولت کے لیے محکمہ ماحولیات کا ایک کاؤنٹر قائم کرنے کی ہدایت کی۔ تمام ٹاؤن پلاننگ افسران کی انفرادی کارکردگی کا جائزہ لیا۔ نیز انہوں نے تمام ڈائریکٹرز سے ریکوری، کارروائیوں اور فیلڈ وزٹس کے بارے میں دریافت کیا۔
انہوں نے مزید ہدایت کی کہ افسران فیلڈ میں متحرک رہیں، ایکشن کا مطلب اصلاحی اقدامات کرنا ہے۔ محمد علی رندھاوا نے کہا کہ ٹاؤن پلاننگ اور سی ایم پی ونگ کے افسران کی کارکردگی کا باقاعدگی سے جائزہ لیا جائے گا۔
مزید خبروں اور اپڈیٹس کیلئے وزٹ کیجئے گرانہ بلاگ
