لاہور: لاہور ڈویلپمنٹ اتھارٹی (ایل ڈی اے) نے بند روڈ پر جاری ’کنٹرولڈ ایکسیس کوریڈور‘ منصوبے کے ٹھیکیداروں کو ترقیاتی کاموں میں تیزی لانے کے لیے اضافی وسائل کی تعیناتی کا حکم دیا ہے۔ پراجیکٹ سائٹ کے دورے کے دوران ایل ڈی اے کے ڈائریکٹر جنرل محمد علی رندھاوا نے پیکج 1 (بابو صابو اور سگیاں کے درمیان) اور پیکج 2 (سگیاں اور نیازی چوک کے درمیان) پر کام کا معائنہ کیا۔ دونوں پیکجز کے کنٹریکٹرز کے ساتھ میٹنگ کے دوران پراجیکٹ کے دونوں پیکجز پر کام کو تیز کرنے کا پلان پیش کیا گیا۔ ڈی جی نے پیکج 2 کے ٹھیکیدار سے کام کی رفتار تیز کرنے کے لیے مشینری اور لیبر سمیت مزید وسائل بروئے کار لانے کی ہدایات کیں۔
تفصیلات کےمطابق ایل ڈی اے کے چیف انجینئر اسرار سعید، کنٹریکٹرز اور پراجیکٹ ڈائریکٹر نے انہیں جاری ترقیاتی کاموں کے بارے میں بریفنگ دی۔ انہیں بتایا گیا کہ پیکج 1 کا 42 فیصد جبکہ پیکج 2 کا 25.5 فیصد کام مکمل ہو چکا ہے۔
بعد ازاں ڈی جی ایل ڈی اے نے شاہدرہ چوک کا دورہ کیا۔ اور نئے تعمیر ہونے والے فلائی اوور کے ارد گرد ترقیاتی کاموں کا معائنہ کیا۔ انہوں نے متعلقہ حکام اور ٹھیکیداروں کو ہدایت کی کہ اس میگا پراجیکٹ کی جلد تکمیل کے لیے باقی ماندہ کام بشمول شجرکاری، سائیڈ روڈ اور ڈرین کی تعمیر کو تیز کیا جائے۔ ڈی جی نے انہیں بتایا کہ شاہدرہ چوک پر ٹریفک پولیس کے تعاون سے ٹریفک مینجمنٹ پلان پر عملدرآمد کیا جائے۔
مزید خبروں اور اپڈیٹس کیلئے وزٹ کیجئے گرانہ بلاگ۔
