وزیرِاعلیٰ پنجاب چوہدری پرویز الہیٰ نے لاہور ڈویلپمنٹ اتھارٹی (ایل ڈی اے) کو ہدایت کی ہے کہ تمام بڑی عمارات کا نقشہ ریسکیو 1122 کے سیفٹی آڈٹ کے بغیر منظور نہ کیا جائے۔
وزیرِاعلیٰ پنجاب چوہدری پرویز الہیٰ کی زیرِ صدارت ایل ڈی اے کے ہونے والے اجلاس میں مختلف امور کو زیرِغور لایا گیا۔ اجلاس میں وزیراعلیٰ نے ایل ڈی اے کی حدود میں موجود دیگر چھوٹے شہروں کو بھی ترقیاتی کاموں میں شامل کرنے کی ہدایت دی۔ اجلاس کے دوران 1200 سے زائد درخواست گزاروں کو الاٹمنٹ کی منظوری دی گئی۔
حکام کے مطابق اجلاس میں فنانس اینڈ ٹریڈ سینٹر جوہر ٹاؤن میں اپارٹمنٹس کی تعمیر کی منظوری دی گئی۔ خیابانِ امین جوہر ٹاؤن کی بہتری کے منصوبے کی بھی منظوری دی گئی۔ علاوہ ازیں جوہر ٹاؤن میں ایل ڈی اے کے "واک اینڈ شاپ” کا مارکیٹنگ اور بزنس ماڈل منظور کیا گیا۔ موہلنوال ہاؤسنگ اسکیم کے انفراسٹرکچر کی بہتری کے منصوبے کی بھی منظوری عمل میں لائی گئی۔
اجلاس میں تمام صنعتوں کو ایل ڈی اے سٹی کے ایک جانب منتقل کرنے کا بھی فیصلہ کیا گیا۔
مزید خبروں اور اپڈیٹس کیلئے وزٹ کیجئے گرانہ بلاگ۔
