لاہور: لاہور ڈویلپمنٹ اتھارٹی (ایل ڈی اے) اور ٹریفک انجینئرنگ اینڈ ٹرانسپورٹ پلاننگ ایجنسی (ٹیپا) نے ایک مشترکہ آپریشن میں شادمان مین بلیوارڈ اور سوک سینٹر کے اطراف میں پارکنگ کی خلاف ورزیوں پر متعدد جائیدادوں کو مسمار اور دیگر کو سیل کر دیا۔
تفصیلات کے مطابق کمشنر لاہور اور ڈائریکٹر جنرل ایل ڈی اے محمد علی رندھاوا کی ہدایت پر تین گھنٹے تک جاری رہنے والے آپریشن کے دوران شادمان میں پارکنگ ایریاز پر غیرقانونی تعمیرات میں ملوث دو درجن سے زائد جائیدادوں کو مسمار کرنے سمیت کمرشل املاک سے ناجائز تجاوزات ہٹا دی گئیں۔
مزید یہ کہ شادمان مین بلیوارڈ کے قرب و جوار میں قائم اسٹورز فرنٹ سے خلاف ورزیوں کا خاتمہ کیا گیا۔ فاطمہ میموریل ہسپتال کے رائٹ آف وے میں حائل رکاوٹیں بھی ہٹا دی گئیں۔ سیٹ بیک ایریاز تجاوزات دو سٹورز اور ایک فوڈ پوائنٹ کو بند کیا گیا۔ جبکہ دو کمرشل پلازوں کو پارکنگ ایریاز پر تجاوزات کے باعث سیل کر دیا گیا۔
علاوہ ازیں گلبرک مین بلیوارڈ پر سٹور، دفتر اور تین فارمیسیز کو سیل کر دیا۔ نیز سوک سینٹر میں آٹھ غیر قانونی عارضی دکانیں مسمار کر دی گئیں۔ تاہم آپریشن سے قبل متعدد نوٹس جاری کیے گئے تھے۔
آپریشن میں پولیس اور بھاری مشینری کے ساتھ ڈائریکٹر پارکنگ انفورسمنٹ ٹی ای پی اے، ڈائریکٹر پرائیویٹ ہاؤسنگ سکیم، ڈپٹی ڈائریکٹر پی ایچ ایس، ڈپٹی ڈائریکٹر ٹاؤن پلاننگ، انفورسمنٹ ونگ اور ٹی ای پی اے کے افسران نے شرکت کی۔
مزید خبروں اور اپڈیٹس کیلئے وزٹ کیجئے گرانہ بلاگ۔
