لاہور: لاہور ڈویژن کے چاروں اضلاع میں تجارتی سرگرمیوں کی بحالی اور فروغ کے لئے موجودہ معاشی صورتحال کو مدنظر رکھتے ہوئے ایل ڈی اے نے نئے لینڈ یوز ریگولیشنز متعارف کردیئے۔
لاہور ڈویلپمنٹ اتھارٹی کی نئی کمرشلائزیشن پالیسی کی تفصیل سے اتھارٹی کے وائس چیئرمین اس ایم عمران نے میڈیا کو آگاہ کیا۔
انہوں نے کہا کہ وزیر اعظم کے وژن کے مطابق ایل ڈی اے نے تمام اسٹیک ہولڈرز سے مشاورت کرنے کے بعد کاروبار دوست قواعد و ضوابط متعارف کروائے ہیں۔
انہوں نے مزید کہا کہ ان قواعد و ضوابط کی تشکیل کی بنیادی وجہ نوجوانوں کے لئے روزگار کے نئے مواقع کی تشکیل ہے۔
انہوں نے کہا کہ یہ قوانین وزیر اعلی کی نگرانی میں تیار کرائے ہیں جس میں شہر کی کاروباری سرگرمیوں کے علاوہ نئے منصوبوں کے آغاز کے لئے بھی غیر معمولی مراعات اور سہولیات فراہم کی گئی ہیں۔
انہوں نے بتایا کہ ان ضوابط کے تحت مخصوص قسم کی خدمات اور نجی طریقوں کو کمرشلائزیشن فیس کی ادائیگی سے مستثنیٰ قرار دیا گیا ہے۔
انہوں نے مطلع کیا کہ انجینئرز، ڈاکٹرز، آرکیٹیکٹس اور معتدد شعبوں سے وابستہ کنسلٹنٹس کو کمرشلائزیشن فیس کی ادائیگی کے بغیر اپنے مکانات کا 25 فیصد احاطہ پیشہ ورانہ امور کے لیے استعمال کرنے کی اجازت ہے۔
انہوں نے کہا کہ عوامی خدمت اور فلاحی سرگرمیوں کی حوصلہ افزائی کے لئے اُن پر عائد کمرشل فیس معاف کر دی گئی ہے۔
ایل ڈی اے کے وائس چیئرمین نے بتایا کہ تاجر برادری کی سہولت کے لئے اقساط میں کمرشلائزیشن فیس جمع کروانے کی سہولت فراہم کی گئی ہے۔ ان قسطوں کی ادائیگی اب دو سال کی بجائے تین سال کے عرصے میں کی جاسکتی ہے۔
انہوں نے بتایا کہ گھروں کے قریب لوگوں کی سہولت کے لئے رہائشی زون میں اسپتالوں، ڈے کیئر سنٹرز اور کلبز کے قیام کی اجازت دی گئی ہے۔
گزشتہ ہفتے لاہور ڈویژن میں 48 نئے کاروبار شروع کرنے کی اجازت دی گئی۔
مزید خبروں اور اپڈیٹس کے لئے وزٹ کیجئے گرانہ بلاگ۔
