لاہور: وفاقی حکومت کے جاری کردہ حالیہ تعمیراتی پیکج سے متعلق ایل ڈی اے نے اپنے انتظامات مکمل کرلئے۔
وزیرِ اعظم پاکستان کے ویژن کے تحت تعمیراتی سرگرمیوں کی حوصلہ افزائی کے لیے وزیرِ اعلیٰ پنجاب کی رہنمائی میں ایل ڈی اے کے انتظامات میں30 دن میں رہائشی، کمرشل، صنعتی اور ویر ہاؤس نقشہ جات کی منظوری شامل ہے۔اس کے علاوہ عمارت کے تکمیلی سرٹفکیٹ کا اجراء 30 دن میں ہوگا، پرائیویٹ رہائشی اسکیموں کی منظوری بھی محض 60 دن میں ہوگی۔ زمین کے کمرشل، صنعتی اور دیگر استعمال کی اجازت 45 دن میں ملے گی جبکہ درخواستوں کی پراسیسنگ کے لیے ایل ڈی اے نے ون ونڈو آپریشن کے تحت ای خدمت مرکز کا قیام کردیا ہے۔
یاد رہے کہ حال ہی میں وفاقی حکومت نے تعمیراتی صنعت کے لیے مراعاتی پیکج کا اعلان کیا جن میں تعمیراتی شعبے کیلئے صنعت کا درجہ، تعمیراتی ٹیکسوں میں نمایاں کمی اور اس سیکٹر میں سرمایہ کاری کرنے پر ذرائع آمدن سے متعلق پوچھ گچھ نہ ہونے کی سہولیات شامل ہیں۔
مزید خبروں اور اپڈیٹس کے لیے وزٹ کیجئے گرانا بلاگ۔
