لاہور ڈویلپمنٹ اتھارٹی (ایل ڈی اے) حکام کا کہنا ہے کہ وزیرِ اعلیٰ پنجاب نے لاہور ماسٹر پلان 2050 کے ساتھ ساتھ تارکین وطن پاکستانیوں کے لیے بھی ’ون ونڈو‘ سہولت دینے کی منظوری دے دی۔
گذشتہ روز ایل ڈی اے گورننگ باڈی کے اجلاس کی صدارت کرتے ہوئے وزیراعلیٰ نے کہا کہ ون ونڈو کی سہولت کی وجہ سے بیرون ملک مقیم پاکستانی ایک دن میں ایل ڈی اے سے پلاٹ خرید سکیں گے اور وہ پلاٹ اپنے نام پر منتقل بھی کرا سکیں گے۔
انہوں نے متعلقہ حکام کو شاہدرہ منصوبے پر جلد از جلد عملدرآمد کرنے کی بھی ہدایت کی تاکہ اس پر تعمیراتی کام کا آغاز کیا جا سکے۔
حکام کے مطابق اجلاس میں لاہور ماسٹر پلان 2050 پر تفصیلی بریفنگ دی گئی جس میں اقتصادی ترقی، علاقائی حکمت عملی اور دیگر امور پر تبادلہ خیال کیا گیا۔
ماسٹر پلان میں لاہور کی بڑھتی ہوئی آبادی کی رہائشی ضروریات پر غور کرنے پر زور دیتے ہوئے حکام نے کہا کہ مضافاتی علاقوں میں رہنے والوں کو بھی وہی سہولیات فراہم کی جائیں گی جو شہر کے باسیوں کو حاصل ہیں تاکہ شہر پر بوجھ کم کیا جا سکے۔
حکام کے مطابق اجلاس میں بفر زونز کے قیام کے لیے بڑے پیمانے پر شجر کاری کرنے پر غور کیا گیا۔ علاوہ ازیں ٹریفک کی نقل و حرکت میں آسانی کے لیے انٹر چینجز اور فلائی اوورز کی تعمیر کے علاوہ پبلک ٹرانسپورٹ کے نظام کو بھی جدید خطوط پر استوار کرنے پر بھی گفتگو ہوئی۔ اراکین کا کہنا تھا کہ مزید زرعی اراضی حاصل کرنے کے بجائے کثیر المنزلہ عمارات کی تعمیر کو فروغ دینا چاہیے۔
حکام نے بتایا کہ وزیراعلیٰ پنجاب نے آزادی چوک پر موٹر سائیکل سواروں کے لیے اوور ہیڈ برج، اکبر چوک کو سگنل فری بنانے کے لیے فلائی اوور اور ایک انڈر پاس تعمیر کرنے کی بھی منظوری دی۔
علاوہ ازیں ایل ڈی اے بلڈنگ اینڈ زوننگ ریگولیشن 2019 میں ترامیم کی بھی منظوری دی گئی۔
حکام کے مطابق ایل ڈی اے کی اسکیموں کے لیے ایک ترقیاتی سب کمیٹی تشکیل دینے کی بھی منظوری دی گئی ہے جس میں اراکین پارلیمنٹ کو بھی شامل کیا جائے گا۔
جوہر ٹاؤن میں زیر التواء پلاٹوں کو ریگولرائز کرنے کے علاوہ ایل ڈی اے ایونیو ون کے بقایا جات کی ادائیگی کی مدت میں توسیع اور ٹی ای پی اے کے ترقیاتی کاموں پر عائد پابندی کو ختم کرنے کی بھی منظوری دی گئی۔ علاوہ ازیں ایل ڈی اے گورننگ باڈی کے گزشتہ اجلاس کے فیصلوں کی بھی منظوری دی گئی۔
مزید خبروں اور اپڈیٹس کیلئے وزٹ کیجئے گرانہ بلاگ۔
