اسلام آباد: وفاقی ترقیاتی ادارے (سی ڈی اے) نے کری ماڈل ویلج کو دوبارہ شروع کرنے کا فیصلہ کیا ہے، جس سے ادارے کو ایک کھرب روپے کی آمدن متوقع ہے۔ گزشتہ دور حکومت میں اس منصوبے کو اوورسیز پاکستانیوں کے نام سے سیکٹر کے طور پر شروع کیا گیا تھا جسے بعد ازاں چھوڑ دیا گیا۔ ذرائع کے مطابق سی ڈی نے 9سال بعد کری ماڈل ویلج کو دوبارہ کھولنے کا فیصلہ کیا ہے ۔
اس فیصلے کے بعد کری سے منسلک سی ڈی اے کی 22ہزار کنال اراضی کو بروئے کار لایا جاسکے گا۔ چیئرمین سی ڈی اے عامر علی احمد کے مطابق کری ماڈل ویلج کے متاثرین کے کلیمز جو ایف آئی اے اور نیب سے کلیر ہوچکے ہیں انکو دوبارہ الاٹ کیا جائیگا ۔ ذرائع کے مطابق سی ڈی اے کری ایریا میں ایک نیا سیکٹرشروع کرینگے جس سے ان کو ایک کھرب روپے حاصل ہوسکتے ہیں۔ گزشتہ دور حکومت میں بھی سی ڈی اے نے اسی اراضی پر اوورسیز کے لیے سیکٹر شروع کرنے کے منصوبے کا اعلان کیا تھا مگر اسے عملی جامہ نہیں پہنایا گیا۔
