اسلام آباد: آئی ایم ایف کی جانب سے مثبت جواب آنے کے بعد پاکستان پر بین الاقوامی ممالک کا اعتماد بحال ہونا شروع ہو گیا۔ جاپان کا بی پی ایس انویسٹمنٹ گروپ پاکستان میں ایک ارب ڈالر کی سرمایہ کاری کرے گا۔
جاپان کے سرمایہ کار گروپ بی پی ایس انویسٹمنٹ کے بانی تاکا سوجی نے وفد کے ہمراہ وزیراعظم شہباز شریف سے ملاقات کی اور پاکستانی معیشت کے مختلف شعبوں میں ایک ارب ڈالر کی سرمایہ کاری کرنے میں دلچسپی کا اظہار کیا۔
وزیراعظم نےاس موقع پر سرمایہ کاری بورڈ کے حکام کو ہدایت کی کہ گروپ کو سہولیات فراہم کرنے کے لئے تمام ضروری اقدامات کیے جائیں۔
انہوں نے جاپانی سرمایہ کاری کا خیرمقدم کیا کہ اس سے ملک میں ترقی و خوشحالی بڑھے گی اور روزگار کے نئے مواقع جنم لیں گے۔
انہوں نے مزید کہا کہ جاپان پاکستان کا مخلص دوست ہے اور پاکستان مختلف شعبوں میں جاپان کے ساتھ تعاون کو قدر کی نگاہ سے دیکھتا ہے۔
اس سے قبل متحدہ عرب امارات نے بھی پاکستان کے مختلف شعبوں میں ایک ارب ڈالر کی سرمایہ کاری کرنے کا اعلان کیا تھا جس پر وزیراعظم شہباز شریف نے شیخ محمد بن زید النہیان کا شکریہ ادا کیا۔
مزید خبروں اور اپڈیٹس کیلئے وزٹ کیجئے گرانہ بلاگ۔
