اسلام آباد ٹریفک پولیس نے دس محرم الحرام کے لیے ٹریفک پلان تشکیل دے دیا

اسلام آباد: اسلام آباد ٹریفک پولیس نے دس محرم الحرام کی مناسبت شہر بھر کے لیے ٹریفک پلان تشکیل دے دیا۔ ایس ایس پی ٹریفک فرخ حمید نے شہریوں سے ٹریفک پولیس اہلکاروں سے تعاون اور متبادل راستے استعمال کرنے کی اپیل کی۔

10 محرم کا مرکزی جلوس اسٹریٹ نمبر 58، سیکٹر جی سکس فور امام بارگاہ قصرِ زینہ سے صبح 4 بجے شروع ہوگا اور اختتام پذیر جی سکس ٹو کی امام بارگاہ پر ہوگا۔

اس کا روٹ پریس کلب اسٹریٹ نمبر 5، لال مسجد چوک اسٹریٹ نمبر 73، بیگم سرفراز روڈ اسٹریٹ نمبر 14، پولی کلینک اور کلثوم پلازہ فضل حق روڈ رہے گا۔

سیکٹر ایف سکس سے آبپارہ جانے والے افراد میونسپل روڈ، ایمبیسی روڈ، جناح ایوینیو روڈ اور سیونتھ ایونیو کا استعمال کرسکتے ہیں۔

10 محرم الحرام کا دوسرا جلوس ہاؤس نمبر 366 گلی نمبر 37 سیکٹر ایف الیون تھری سے 2 بجے شروع ہوگا۔ اس کے راستے میں ایف الیون تھری سگنل ڈبل روڈ، نیول کالونی ہلال روڈ، حیدری چوک اور ٹیلی نار پلازہ آئیں گے اور یہ معمول کی ٹریفک کے لیے بند رہیں گے۔

زیرو پوائنٹ، آبپارہ مارکیٹ، راولپنڈی اور سیکٹر ایف الیون سے موٹر وے جانے والے لوگ اپنی منزل تک پہنچنے کے لئے سروس روڈ مہرآبادی، کاظمین چوک اور ایف الیون سگنل کشمیر ہائی وے کا استعمال کریں گے۔

دس محرم الحرام کا تیسرا جلوس بارہ بجے امام بارگاہ موسیٰ کاظم سے شروع ہوگا اور اس کے راستوں میں گلی نمبر اٹھارہ سیکٹر آئی ٹین، سی ڈی اے چوک، حبیب ترپال چوک اور کارنر سروس روڈ آئیں گے جو ٹریفک کے لیے بند ہوں گے۔

آئی جے پی روڈ، سی ڈی اے چوک، سروس روڈ آئی ٹین ون اور ویسٹ روڈ سمیت متبادل راستوں پر ٹریفک کا رخ موڑ دیا جائے گا۔

ایس ایس پی ٹریفک نے کہا کہ آئی ٹی پی نے 10 محرم الحرام کو ماتمی جلوس نکالنے کے لئے خصوصی ٹریفک پلان وضع کیے ہیں اور انہوں نے شہریوں سے اس موقع پر متبادل راستوں کو استعمال کرنے کی اپیل کی۔

مزید خبروں اور اپڈیٹس کے لیے وزٹ کیجئے گرانا بلاگ۔