اسلام آباد: عالمی مالیاتی ادارے انٹرنیشنل مانیٹری فنڈ (آئی ایم ایف) کی پٹرولیم ڈویلپمنٹ لیوی کی سخت شرط پوری کر دی گئی جبکہ رواں ماہ آئی ایم ایف پاکستان کو 1.2 ارب ڈالر جاری کر دے گا۔
وزارتی حکام کے مطابق انٹرنیشنل مانیٹری فنڈ (آئی ایم ایف) کی قسط ملنے میں تمام روکاوٹیں دور ہو چکی ہیں۔
وفاقی دارالحکومت اسلام آبا د میں آئی ایم ایف کی نمائندہ ایستھرپیرز ریز کا کہنا ہے کہ پاکستان نے 31 جولائی کو پٹرولیم ڈویلپمنٹ لیوی میں اضافہ کر کے ساتویں اور آٹھویں جائزہ اجلاس کی تمام پیشگی شرائط پوری کر دیں ہیں۔
دوست ممالک سے مالیاتی تعاون کی یقین دہانیوں کے بعد اگست کے آخر تک آئی ایم ایف ایگزیکٹیو بورڈ پاکستان کو 1.2 ارب ڈالر کی قسط جاری کر دے گا۔
آئی ایم ایف کے اس اعلان کے بعد ملک میں بے یقینی کی کیفیت میں کافی حد تک کمی کی امید ہے اورآنے والے دنوں میں روپے کی قدر میں استحکام ممکن ہو سکتا ہے۔
مرکزی بینک پہلے ہی کہہ چکا ہے کہ روپے کی قدر میں کمی عارضی ہے جبکہ آنے والے دنوں میں پاکستانی روپیہ مستحکم ہو گا۔
پاکستان کو آئی ایم ایف کی طرف سے قسط کی یقین دہانی سے دوست ممالک کے ساتھ ساتھ عالمی مالیاتی اداروں سے بھی فنڈز کے اجراء میں آسانی کا سامنا کرنا پڑے گا جس سے روپے کی قدر پر مثبت اثرات مرتب ہوں گے۔
مزید خبروں اور اپڈیٹس کیلئے وزٹ کیجئے گرانہ بلاگ۔
