سی ڈی اے رواں ماہ شہر کی خوبصورتی اور ترقیاتی کاموں کیلئے پُرعزم

اسلام آباد: وفاقی ترقیاتی ادارے ( سی ڈی اے ) نے رواں ماہ مارچ میں دارالحکومت کی آرائش اور ترقیاتی کاموں کے لیے عزم کا اظہار کیا ہے۔ اس عزم کے تحت شہر کی آرائش اور مختلف سیکٹرز میں زیرِ التوا کاموں کی تکمیل کی جائے گی۔
تفصیلات کے مطابق سی ڈی اے سیکٹر I-15 کے 4 ہزار ہاوسنگ یونٹس کا قبضہ الاٹییز کے سپرد کرے گا۔ جبکہ سیکٹر E-12 کے دو سب سیکٹرز میں تعمیراتی کام مکمل کرلیا جائے گا۔ اسلام آباد میں انکروچمنٹ کے خاتمے کے لیے ہنگامی بنیادوں پر اقدامات شروع کردیے گئے ہیں۔ شہر کے نواحی علاقوں میں گلیوں اور سڑکوں کی پختگی جبکہ پارکس اور گراونڈز کی تعمیر کے لیے 10ارب روپے مختص کیے گئے ہیں۔

مزید یہ کہ سی ڈی اے کے ذرائع آمدن بڑھانے کے لیے ریسورس مینجمنٹ کا شعبہ، بلڈنگ کنٹرول اور پارکس اینڈ ہارٹی کلچرکی ایجسنیاں قائم کردی گئی ہیں۔ یہ دونوں شعبے ریونیو بڑھانے کے لیے ٹیکسیشن پر کام کریں گے۔
میڈیا سے تعارفی نشست میں چیئرمین سی ڈی اے و چیف کمشنر اسلام آباد نور الامین مینگل کا کہنا تھا کہ سالڈ ویسٹ مینجمنٹ کے لیے فریم ورک تیار کیا گیا ہے۔ جبکہ دارالحکومت میں بس ٹرمینل کا ڈیزائن اور تیز ترین سفری سہولت کے لیے سبسڈی سے پاک پرائیوٹ شعبے کے تعاون سے ایکسپریس سروس کا اجراء کیا جائے گا۔

ایک سوال کے جواب میں چیئرمین سی ڈی اے نے بتایا کہ اسلا م آباد کے دیہی علاقوں میں گلیوں ، سڑکوں کی پختگی ، پارکس و گراونڈز کی تعمیر کے لیے سی ڈی اے نے 10ارب روپے کی خطیر رقم مختص کردی ہے۔ اور بدھ کے روز ہونے والے سی ڈی ڈبلیو پی کے اجلاس میں اس کی منظوری بھی دے دی جائے گی۔

مزید خبروں اور اپڈیٹس کیلئے وزٹ کیجئے گرانہ بلاگ۔