موسلادھار بارشیں اور بھارت سے آنے والا سیلابی ریلا انفراسٹرکچر اور فصلوں کیلئے خطرناک

اسلام آباد: بھارت سے آنے والا 70 ہزار کیوسک کا سیلابی ریلا پاکستان میں داخل ہو کر شکرگڑھ کے سرحدی گاؤں جلالہ پہنچ گیا ہے۔

تفصیلات کے مطابق بھارت نے گزشتہ روز دریائے راوی میں ایک لاکھ 85 ہزار کیوسک پانی چھوڑا تھا۔ یہ سیلابی ریلا نیناں کوٹ سے ہوتا ہوا کرتارپور جسٹر پہنچنا شروع ہوگیا ہے۔ اور  اگلے 48 گھنٹوں میں لاہور میں شاہدرہ کے مقام پر پہنچے گا۔ لہٰذا سیلابی ریلے کے باعث دریائے راوی، نالہ بئیں اور دیگر معاون ندی نالوں میں طغیانی آگئی ہے۔

سیلابی ریلے کے باعث فصلیں زیر آب آنے اور متعدد افراد کے پھنس جانے کی اطلاعات ہیں۔ تاہم 300 کے قریب مرد و خواتین اور بچوں کو ریسکو کرلیا گیا۔  مزید یہ کہ  دریائے راوی اور دریائے چناب سے ملحقہ اضلاع میں انتظامیہ الرٹ ہے۔ اور ممکنہ سیلاب کے پیش نظر مختلف اضلاع میں ریلیف کیمپ قائم کر دیا گیا ہے۔

پی ڈی ایم اے کے مطابق دریائے چناب میں مرالہ کے مقام پر درمیانے درجے کا سیلاب ہے۔ دریائے چناب میں خانکی اور قادر آباد پر بھی نچلے درجے کا سیلاب ہے۔ نیز شکر گڑھ نالہ بئیں میں بھی درمیانے درجے کا سیلاب ہے۔ علاوہ ازیں راوی سمیت دیگر دریاؤں میں پانی کا بہاؤ معمول کے مطابق ہے۔ تمام دریاؤں، بیراجوں، ڈیموں اور نالوں میں پانی کے بہاؤ کی مسلسل نگرانی کی جا رہی ہے۔ نیز کنٹرول روم سے پنجاب میں تمام تر صورتحال کی مانیٹرنگ جاری ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔