اسلام آباد: وزیرِ خزانہ شوکت ترین کا کہنا ہے کہ حکومت کم لاگت مکانات کے لیے قرضوں کی فراہمی کا عمل آسان بنانے کے لیے مزید اقدامات کررہی ہے۔
پیر کے روز وزیرِ خزانہ کی زیرِ صدارت کم لاگت مکانات سے متعلق اہم اجلاس ہوا۔ اجلاس میں چیئرمین نیا پاکستان ہاؤسنگ اتھارٹی، گورنر اسٹیٹ بینک اور دیگر سینئر افسران نے شرکت کی۔
اعلامیے کے مطابق چیئرمین نیا پاکستان ہاؤسنگ اتھارٹی نے اجلاس کے شرکاء کو کم لاگت مکانات کی تجاویز پر پیش رفت سے آگاہ کیا۔
چیئرمین نے اجلاس کے شرکاء کو بتایا کہ ہاؤسنگ قرض دینے والے بینک آگاہی مہم بھی چلا رہے ہیں۔ اسٹیٹ بینک آف پاکستان کے سربراہ رضا باقر نے اِس حوالے سے بتایا کہ پاکستان میں مختلف نوعیت کے 8 کروڑ 20 لاکھ بینک اکاؤنٹ ہیں۔
دورانِ اجلاس وزیرِ خزانہ نے کہا کہ عوام کو زیادہ سے زیادہ سہولت دینے کے لیے بینکوں کی کارکردگی کی نگرانی جاری ہے۔ اُنہوں نے یہ بھی کہا کہ قرض کا عمل آسان بنانے کے ساتھ شفافیت کے لیے اقدامات کیے جارہے ہیں۔
اعلامیے کے مطابق گورنر اسٹیٹ بینک نے معلومات کی فراہمی اور شکایات کے ازالے کے لیے سٹیزن فیڈبیک میکنزم پر بھی اجلاس کے شرکاء کو اعتماد میں لیا جس پر وزیرِ خزانہ نے جائز تحفظات کو جلد از جلد دور کرنے کی ہدایت کی۔
مزید خبروں اور اپڈیٹس کیلئے وزٹ کیجئے گرانہ بلاگ۔
