حکومت کا کم آمدن افراد کے لیے سستے گھروں کی فراہمی کے منصوبے پر غور

وفاقی سیکرٹری برائے وزارتِ ہاؤسنگ اینڈ ورکس افتخار علی شلوانی کا کہنا ہے کہ حکومت آئندہ ماہ ہونے والے ہاؤسنگ ایکسپو کے تحت کم آمدن افراد کو سستے مکانات فراہم کرنے کا ارادہ رکھتی ہے۔

حکام کے مطابق وفاقی سیکرٹری برائے ہاؤسنگ اینڈ ورکس افتخار علی شلوانی نے  احسن ظفر بختاوری کی زیرِ صدارت اسلام آباد چیمبر آف کامرس اینڈ انڈسٹری (آئی سی سی آئی) کے وفد سے ملاقات میں آئندہ ماہ ہونے والے بین الاقوامی ہاؤسنگ ایکسپو کے منصوبوں پر تبادلہ خیال کیا اور ان کو حتمی شکل دی۔

اس موقع پر صدر آئی سی سی آئی کا کہنا تھا کہ ہاؤسنگ اور کنسٹرکشن سیکٹر سے 50 سے زائد انڈسٹریز منسلک ہیں جس سے ان کے کاروبار کو فروغ مل رہا ہے۔ ان کا کہنا تھا کہ وفاقی دارالحکومت اور دیگر شہروں میں سستے گھروں کی تعمیر کے لیے ضروری تبدیلیاں لانے کی ضرورت ہے۔ اس سے نہ صرف روزگار کے پیدا ہونے کے امکانات روشن ہوں گے بلکہ معیشت بھی مضبوط ہو گی۔

حکام کے مطابق آئی سی سی آئی کے صدر احسن ظفر بختاوری نے وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کو عمودی تعمیرات کے لیے بلڈنگ رولز میں تبدیلی کی حوصلہ افزائی کی۔ ان کا کہنا تھا کہ کئی سرمایہ کار اسلام آباد میں بلند و بالا عمارتوں کی تعمیر میں دلچسپی رکھتے ہیں۔

انہوں نےسابقہ سی ڈی اے​ ​انتظامیہ کی جانب سے منظور شدہ زیرِ تعمیر منصوبوں کی بروقت تکمیل کے لیے فیڈرل بورڈ آف ریونیو (ایف بی آر) پر زور دیا کہ وہ کم از کم ایک سال کی توسیع کا اعلان کرے۔

یاد رہے کہ آئندہ ماہ ہونے والے بین الاقوامی ہاؤسنگ ایکسپو کی تقریب 8 سے 11 دسمبر کے دوران اسلام آباد کنونشن سنٹر میں منعقد ہو گی۔ وفاقی سیکرٹری برائے ہاؤسنگ اینڈ ورکس کا کہنا تھا کہ سستے مکانات کے فروغ کے لیے وزیراعظم شہباز شریف ہاؤسنگ ایکسپو کا افتتاح کریں گے۔

مزید خبروں اور اپڈیٹس کیلئے وزٹ کیجئے گرانہ بلاگ۔