اسلام آباد: وفاقی وزیر برائے منصوبہ بندی اور ترقی احسن اقبال نے صوبائی حکومتوں کے تعاون سے ”ایک ضلع کی مدد“ پروگرام شروع کرنے کا اعلان کیا ہے جس کے تحت سیلاب سے محفوظ اضلاع کو ایک ماہ کے عرصے کے لیے سیلاب سے متاثرہ اضلاع کا کنٹرول حاصل ہو گا جو ان علاقوں کی بحالی کے لیے انتظامی معاملات میں بہتری کا باعث بنے گا۔
وفاقی وزیر کا صحافیوں کو بریفنگ دیتے ہوئے کہنا تھا کہ اس پروگرام کے تحت ملک بھر خصوصاً پنجاب میں سیلاب سے متاثر نہ ہونے والے بڑے اضلاع کے انتظامی، انسانی اور صحت کے وسائل سیلاب سے متاثرہ اضلاع کیلئے دستیاب ہوں گے۔
احسن اقبال نے کہا کہ خواتین کی صحت کی ضروریات کو مدِنظر رکھتے ہوئے حکومت متاثرہ علاقوں میں موبائل کلینکس اور زچہ و بچہ ہسپتال قائم کررہی ہے۔
اُنہوں نے کہا کہ یونیورسٹی کے طلباء کی مدد سے زچہ و بچہ کی غذا کے لئے 20 لاکھ پیکٹ تیار کئے جائیں گے۔
ناگہانی آفات سے نمٹنے کے قومی ادارے کے چیئرمین لیفٹیننٹ جنرل اخترنواز کا اس موقع پر کہنا تھا کہ ابھی تک بیس ممالک نے پاکستان کے لئے 114 امدادی پروازیں بھیجی ہیں،جس پر ہم انہیں خراج تحسین پیش کرتے ہیں۔
انہوں نے کہا کہ گندم کی بوائی کیلئے سندھ میں زرعی زمین سے سیلاب کا پانی نکالا جارہا ہے، اُن کا کہنا تھا کہ مکمل شفافیت یقینی بنانے کے لئے امدادی سامان کا مکمل ریکارڈ رکھا جارہا ہے۔
مزید خبروں اور اپڈیٹس کیلئے وزٹ کیجئے گرانہ بلاگ۔
