اسلام آباد: پاکستان اور فرانس نے شاہی قلعہ لاہور کی تزئین و آرائش کے منصوبے کے حوالہ سے 22 ملین یورو (4.5 ارب روپے) کے معاہدے پر دستخط کر دیے ہیں۔
یہ منصوبہ فرانس کی فرنچ ڈویلپمنٹ ایجنسی (ایف ڈی اے) کی زیرِ نگرانی مکمل کیا جائے گا جس کا مقصد سیاحت کا فروغ اور اقتصادی سرگرمیوں میں اضافے کے ساتھ ساتھ پاکستان میں تاریخی ورثہ کی عمارتوں کو موسمیاتی تبدیلیوں سے تحفظ فراہم کرنا ہے۔
واضح رہے کہ 1981 میں یونیسکو نے شاہی قلعہ لاہور کی تاریخی عمارت کو درپیش مختلف خطرات سے آگاہ کرتے ہوئے اس کی بحالی کی تجاویز پیش کی تھیں۔
اس موقع پر فرانس کے پاکستان میں سفیر نکولس گیلے نے کہا ہے کہ پنجاب حکومت کے ساتھ تاریخی ورثہ کے تحفظ پر فخر ہے جس سے نہ صرف شاہی قلعہ بلکہ اس کے اردگرد کے علاقوں میں سیاحت اور معاشی سرگرمیوں کو فروغ حاصل ہو گا۔
انہوں نے کہا کہ یہ منصوبہ پانچ سال میں مکمل کیا جائے گا جس سے شاہی قلعہ لاہور کو موسمیاتی تبدیلیوں سے تحفظ فراہم کرنے میں مدد ملے گی۔
والڈ سٹی لاہور اتھارٹی کے ڈائریکٹر جنرل کامران لاشاری نے شاہی قلعہ لاہور کی تزئین و آرائش اور بحالی کے حوالہ سے فرانس کی کاوشوں کو سراہا ہے۔
مزید خبروں اور اپڈیٹس کیلئے وزٹ کیجئے گرانہ بلاگ۔
