شدید سیلاب سے سندھ میں چاول کی 80 فیصد اور جنوبی پنجاب میں 60 فیصد فصل تباہ

اسلام آباد: پاکستان ہائی ٹیک ہائبرڈ سیڈ ایسوسی ایشن (پی ایچ ایچ ایس اے) کے چیئرمین شہزاد علی ملک نے کہا ہے کہ پاکستان میں حالیہ سیلاب سے سندھ میں چاول کی 80 فیصد اور جنوبی پنجاب میں 60 فیصد فصل تباہ ہو گئی ہے۔

ان کا کہنا ہے کہ حالیہ سیلاب سے انفراسٹرکچر، سڑکیں اور پل مکمل طور پر تباہ ہو چکے ہیں اور ملک کے سیلاب زدہ علاقوں میں معیشت بری طرح متاثر ہو رہی ہے۔

ایسوسی ایشن کی ایگزیکٹو کمیٹی کے اجلاس کی صدارت کرتے ہوئے انہوں نے کہا کہ سندھ میں چاول کی کاشت کے علاقوں میں سب سے زیادہ سیلاب ریکارڈ کیا گیا جس کی وجہ سے 18 لاکھ ٹن چاول یعنی اس کی 80 فیصد متوقع پیداوار کا نقصان ہوا۔

جنوبی پنجاب میں بھی یہی افسوسناک صورتحال ہے اور چاول کی فصل کو 60 فیصد نقصان پہنچا ہے۔

انہوں نے کہا کہ سندھ کے کپاس اور گنے کے زون میں سیلاب کم رہا ہے۔ تاہم دونوں زونز میں روزانہ کی بنیاد پر غیر معمولی بارشیں ہوئیں جس سے کپاس کی فصل تقریباً مکمل طور پر تباہ ہو گئی۔

انہوں نے کہا کہ ابتدائی تخمینوں کے مطابق دونوں صوبوں میں سبزیوں اور مویشیوں سمیت تینوں تجارتی فصلوں سے کم از کم 3 ارب امریکی ڈالر کا نقصان ہوا ہے۔

ان کا کہنا تھا کہ سیلاب کی وجہ سے ملک میں خوراک کی درآمد میں اضافہ کرنا ہو گا جہاں 43 فیصد آبادی پہلے ہی غذائی عدم تحفظ کا شکار ہے۔

سیلاب کے نتیجے میں درآمدات زیادہ، برآمدات کم اور مہنگائی زیادہ ہو سکتی ہے جس سے معاشی استحکام کی کوششوں کو نقصان پہنچے گا۔

شہزاد علی ملک نے سندھ اور پنجاب کی حکومتوں پر زور دیا کہ وہ دھان کی موجودہ کھڑی فصلوں کو بچانے کے لیے مطلوبہ پانی کی مکمل دستیابی کو یقینی بنائیں۔

انہوں نے کہا کہ سیلاب سے متاثرہ تمام کسانوں کو بلاسود قرضے فراہم کرنے کی ضرورت ہے تاکہ وہ اگلی فصلیں کاشت کرسکیں۔

انہوں نے حکومت پر زور دیا کہ وہ کھاد، تصدیق شدہ بیج اور رعایتی نرخوں پر بجلی کی دستیابی کو یقینی بنائے۔

شہزاد ملک کا مزید کہنا تھا کہ حکومت ملک بھر میں ہر قسم کے غیر تصدیق شدہ بیجوں کے استعمال پر پابندی عائد کرے اور بمپر پیداوار کے لیے صرف ہائی ٹیک ہائبرڈ یا تصدیق شدہ بیج ہی استعمال کیے جائیں جس سے یقیناً کسانوں کے منافع میں بھی اضافہ ہوگا۔

مزید خبروں اور اپڈیٹس کیلئے وزٹ کیجئے گرانہ بلاگ۔