سیلاب سے ہونے والے نقصانات کا تخمینہ 30 ارب ڈالر سے زائد ہے: وزیراعظم شہباز شریف

نیویارک: وزیراعظم شہباز شریف نے کہا ہے کہ پاکستان میں سیلاب سے بہت بڑے پیمانے پر تباہی ہوئی ہے اور پاکستان کو اس سیلاب سے ہونے والے نقصانات کا تخمینہ 30 ارب ڈالر سے زائد ہے۔

انہوں نے کہا کہ سیکرٹری جنرل اقوام متحدہ نے پاکستان کی امداد کیلئے ڈونرز کانفرنس منعقد کرنے کے حوالے سے آگاہ کیا ہے۔

گلوبل کمیونیکیشنز کی انڈر سیکرٹری جنرل ملیسا فلیمنگ کے ہمراہ میڈیا سے گفتگو کرتے ہوئے انہوں نے کہا کہ اقوام متحدہ کے سیکرٹری جنرل نے پاکستان کے سیلاب متاثرہ علاقوں کا دورہ کیا اور انہوں نے پوری دنیا سے اپیل کی کہ پاکستان تاریخ کے بدترین سیلابی تباہی کا شکار ہے اوراس کی بھرپور مدد کی جائے۔

وزیراعظم کا کہنا تھا کہ اس پر عالمی برادری نے خاطرخواہ حصہ ڈالا ہے لیکن تباہی کا حجم بہت زیادہ ہے کیونکہ پاکستان میں حالیہ سیلاب سے 10 لاکھ گھر تباہ ہوئے، 40 لاکھ ایکڑ رقبہ پر کھڑی کپاس، چاول سمیت دیگر فصلیں تباہ ہوگئی ہیں، 9 لاکھ مویشی پانی میں بہہ گئے، ہزاروں کلومیٹر شاہراہیں تباہ ہوئیں، سینکڑوں پل تباہ ہوگئے، سیلاب کا پانی کھڑا ہونے کی وجہ سے گندم اور کپاس کی فصل کیلئے زمین تیار نہیں، اس کیلئے کھاد اور بیج درکار ہیں۔

انہوں نے کہا کہ سیلاب سے 30 ارب ڈالر سے زائد کا نقصان ہوا ہے اور اس میں اضافہ بھی ہو سکتا ہے۔

وزیراعظم شہباز شریف نے کہا کہ اقوام متحدہ کے سیکرٹری جنرل سے ملاقات ہوئی ہے اور وہ دکھی انسانیت کی آواز ہیں۔

پاکستان کیلئے انہوں نے جنرل اسمبلی میں اپنی تقریر میں بھی آواز اٹھائی جبکہ امریکی صدر جوبائیڈن، ترکی کے صدر رجب طیب اردوان، ایران کے صدر سمیت تمام رہنمائوں نے پاکستان میں سیلاب کی تباہ کاریوں پر بات کی ہے۔

اقوام متحدہ کے سیکرٹری جنرل نے کہا ہے کہ وہ پاکستان کی امداد کے حوالے سے ڈونرز کانفرنس کا انعقاد کریں گے۔

اس موقع پر گلوبل کمیونیکیشنز کی انڈر سیکرٹری جنرل ملیسا فلیمنگ نے کہا کہ پاکستان میں سیلاب کی تباہ کاریوں کے بارے میں اقوام متحدہ کے سیکرٹری جنرل نے کہا کہ یہ ناقابل تلافی نقصان ہے اور اس میں کوئی شک نہیں کہ یہ سیلاب موسمیاتی تغیر کی وجہ سے ہے۔

انہوں نے کہا کہ یہ موسمیاتی تبدیلی کی بدترین شکل ہے۔ اس مشکل صورتحال میں تمام اقوامِ عالم کو پاکستان کی مدد کرنے کی ضرورت ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔