اسلام آباد: الیکشن کمیشن کی جانب سے پنجاب کی نگران حکومت کو ہاؤسنگ سوسائٹیز کے لیے این او سی جاری کرنے سے روک دیا گیا ہے۔
تفصیلات کے مطابق الیکشن کمیشن کی جانب سے نگران وزیراعلی پنجاب محسن نقوی اورصوبائی چیف سیکرٹری کوجاری ایک مراسلے میں ڈپٹی کمشنرز کا نجی سوسائٹیز کو این او سی جاری کرنے کا ذکر ہے۔ مراسلے کے مطابق این او سی کے اجراء میں کرپشن کا عنصر نظر انداز نہیں کیا جا سکتا۔ مزید یہ کہ پنجاب میں ڈپٹی کمشنرز کو این او سیز جاری کرنے سے روکا جائے۔
علاوہ ازیں کہا گیا ہے کہ ہاؤسنگ سوسائٹیز کو این او سی دینا صرف منتخب حکومت کا کام ہے۔ تاہم الیکشن کمیشن آف پاکستان کے مراسلے کے مطابق اگر نگران حکومت این او سی دینا ضروری سمجھے تو معاملہ الیکشن کمیشن کو بھجوا سکتی ہے۔
مزید خبروں اور اپڈیٹس کیلئے وزٹ کیجئے گرانہ بلاگ
