اسلام آباد: وفاقی وزیر برائے آبی وسائل سید خورشید احمد شاہ نے کہا ہے کہ موسمیاتی تبدیلیوں اور پانی کی بڑھتی ہوئی ضروریات کو مدنظر رکھتے ہوئے نہ صرف زیر تعمیر ڈیموں کی جلد تکمیل ناگزیر ہے۔ بلکہ پانی کے بہتر انتظام پر عمل درآمد بھی ضروری ہے۔
تفصیلات کے مطابق وفاقی وزیر نے دیامر بھاشا، مہمند اور داسو ڈیموں پر ترقیاتی کام کی رفتار کا جائزہ لینے کے لیے ایک اعلیٰ سطحی اجلاس کی صدارت کرتے ہوئے کہا کہ حکمتِ عملی ضروری ہے۔
ان کا مزید کہنا تھا کہ ملک کی توانائی اور آبپاشی کی ضروریات کو پورا کرنے کے لیے ہمیں تمام ڈیموں پر بیک وقت تیز رفتاری سے کام کرنے کی ضرورت ہے۔ نیز انہوں نے کہا کہ حکومت فنڈز کی دستیابی کے لیے ہر ممکن مدد فراہم کر رہی ہے۔ اور اب یہ ہماری ذمہ داری ہے کہ ڈیموں کی تعمیر کے لیے دستیاب وسائل کو بہترین طریقے سے استعمال کریں۔ اس کے علاوہ وزیر نے ڈی جی نیشنل ہائی وے اتھارٹی کو ڈیم ایریاز میں سڑکوں کی تعمیر کو جلد سے جلد یقینی بنانے کی بھی ہدایت کی۔
انہوں نے ڈیموں سے وابستہ لوگوں اور کمیونٹیز کو بہترین صحت، تعلیم اور دیگر ممکنہ سہولیات کی فراہمی کی بھی ہدایات کیں۔ چیئرمین واپڈا سجاد غنی نے بتایا کہ فنڈز کی کمی کے باعث کسی بھی منصوبے پر تعمیراتی کام متاثر نہیں ہوا۔ انہوں نے مزید کہا کہ برج فنانسنگ میکنزم کے ذریعے کام کی رفتار برقرار رکھی گئی۔ اجلاس میں سیکرٹری وزارت آبی وسائل حسن جامی اور دیگر اعلیٰ حکام بھی موجود تھے۔
مزید خبروں اور اپڈیٹس کیلئے وزٹ کیجئے گرانہ بلاگ۔
