وفاقی وزیرِ منصوبہ بندی و ترقی احسن اقبال نے متعلقہ حکام کو سی پیک منصوبوں کی رفتار بڑھانے کے لیے رکاوٹوں کو دور کرنے کی ہدایت کر دی۔ ان کا کہنا ہے کہ سی پیک حکومت کی اولین ترجیح ہے۔
وفاقی وزارتِ منصوبہ بندی و ترقی حکام کے مطابق چین پاکستان اقتصادی راہداری (سی پیک) منصوبوں پر عمل درآمد کے زیرِ التوا مسائل کو حل کرنے کے لیے وفاقی وزیر برائے منصوبہ بندی و ترقی احسن اقبال نے جمعرات کو متعلقہ وزارتوں کو تمام رکاوٹوں کو دور کرنے اور بغیر کسی تاخیر کے منصوبوں کو تیز کرنے کی ہدایت کی۔
انہوں نے یہ ہدایات سی پیک منصوبوں کے تحت کام کرنے والی مختلف کمپنیوں کے سربراہان کے ساتھ اجلاس کی صدارت کرتے ہوئے دیں۔
انہوں نے متعلقہ وزارتوں کو ہدایت کی کہ آلات کی درامدگی کی کلیئرینس سمیت سڑکوں کے انفراسٹرکچر سے متعلق معاملات کو خوش اسلوبی سے جلد از جلد حل کیا جائے اور دو دن میں رپورٹ پیش کی جائے۔
وفاقی وزیر کا کہنا تھا کہ چین اور پاکستان نے برادر ممالک ہونے کے ناطے ہمیشہ تمام باہمی معاملات کو دوستانہ ماحول میں حل کیا ہے۔
وزیر نے اس بات کا اعادہ کیا کہ سی پیک خطے کے لیے گیم چینجر ہے اور حکومت تمام منصوبوں پر عمل درآمد کے لیے پرعزم ہے۔
ملاقات کے دوران یہ بھی فیصلہ کیا گیا کہ گوادر کے پراجیکٹس کے حوالے سے جلد اجلاس بلایا جائے گا جس میں گوادر سے متعلق مسائل پر گفتگو ہو گی۔
مزید خبروں اور اپڈیٹس کیلئے وزٹ کیجئے گرانہ بلاگ۔
