راولپنڈی: رنگ روڈ راولپنڈی منصوبے کی تعمیر کا آغاز کردیا گیا ہے۔ یہ منصوبہ ایک سال کے عرصے میں پایۂ تکمیل کو پہنچے گا۔ اور اس کی لمبائی 38.3 کلو میٹر ہے۔
تفصیلات کے مطابق کمشنر راولپنڈی ڈویژن لیاقت علی چھٹہ نے گورک پور تراھیا کے مقام پر دورہ کرکے منصوبے پر کام کی رفتار اور پلان کا جائزہ لیا۔ منصوبے کے ارد گرد انڈسٹریل زونز قائم کیے جائیں گے۔ راولپنڈی رنگ روڈ پر بانٹھ، چک بیلی خان، اڈیالہ روڈ، چکری روڈ، ٹھلیاں میں انٹر چینجز ہوں گے۔ جبکہ رنگ روڈ کے اردگرد انڈسٹریل زون قائم کیا جائے گا۔
علاوہ ازیں ایڈیشنل کمشنر ریونیو کنزہ مرتضی، ایڈیشنل ڈپٹی کمشنر ریونیو راولپنڈی نبیل سندھ، اسسٹنٹ کمشنر کینٹ راولپنڈی قندیل فاطمہ سمیت دیگر افسران بھی موجود تھے۔
اس موقع پر کمشنر راولپنڈی کا کہنا تھا کہ رنگ روڈ انتہائی اہمیت کا عوامی فلاح کا حامل منصوبہ ہے۔ آج ان عناصر کو مایوسی ہو گی جو کہہ رہے تھے یہ منصوبہ ختم کر دیا گیا۔ کمشنر راولپنڈی کا کہنا تھا کہ رنگ روڈ منصوبے سے ٹریفک کی شدت میں کمی، ملحقہ علاقوں کے رہائشیوں کی آمد و رفت میں آسانی اور روزگار کے حصول کی خاطر روزانہ سفر کرنے والوں کے لیے سہولت پیدا ہو گی۔
واضح رہے کہ پنجاب حکومت کی طرف سے اربوں روپے کی لاگت کا راولپنڈی رنگ روڈ منصوبہ تعمیر کے آغاز سے پہلے ہی تنازعات کا شکار ہو گیا تھا۔ نیب نے اس منصوبے میں ہونے والی مبینہ بے ضابطگیوں کی تحقیقات کرنے کا بھی اعلان کیا تھا۔
مزید خبروں اور اپڈیٹس کیلئے وزٹ کیجئے گرانہ بلاگ
