وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کا کہنا ہے کہ بہارہ کہو بائی پاس منصوبے کے فلائی اوور سیکشن پر تعمیراتی کام شروع کر دیا گیا ہے۔
سی ڈی اے حکام کا کہنا ہے کہ تعمیراتی کام کے دوران، موٹرسائیکلوں کو زیادہ ٹریفک کی بھیڑ کا سامنا کرنا پڑ سکتا ہے کیونکہ موجودہ مری روڈ دو لین ہے اور ٹریفک کے بوجھ کو ایڈجسٹ کرنے کے لیے ناکافی ہے۔ تاہم، حکام نے کہا کہ ٹریفک کی روانی کو یقینی بنانے کے لیے پوری کوشش کی جائے گی۔
حکام کے مطابق بائی پاس روڈ کی کُل لمبائی 5.33 کلومیٹر ہے جس میں گریڈ روڈ کی لمبائی 4 کلومیٹر جبکہ فلائی اوور 1.33 کلومیٹر ہے۔
سی ڈی اے حکام کا کہنا ہے کہ وزیر اعظم کے احکامات کے مطابق ساڑھے چھ ارب روپے لاگت پر مشتمل منصوبہ چار ماہ میں مکمل کر لیا جائے گا۔
سی ڈی اے حکام نے بتایا کہ سڑک کے دو بڑے حصوں یعنی فلائی اوور اور انٹر چینج پر پوری رفتار سے تعمیری کام جاری ہے۔ ان دونوں حصوں کا کام اگلے دو ماہ میں مکمل کر لیا جائے گا۔
حکام کے مطابق سی ڈی اے چیئرمین کیپٹن (ر) محمد عثمان یونس اس منصوبے کی براہِ راست نگرانی کر رہے ہیں اور وقتاً فوقتاً سائٹ کے دورے بھی کر رہے ہیں۔
اس سے قبل 30 ستمبر کو وزیراعظم شہباز شریف نے منصوبے کا سنگ بنیاد رکھا تھا، جس میں منصوبے کی تعمیراتی کمپنی این ایل سی کو ہدایت کی گئی تھی کہ منصوبے کو معینہ مدت سے ایک ماہ قبل یعنی 3 ماہ میں مکمل کرنے کی کوشش کی جائے۔
مزید خبروں اور اپڈیٹس کے لئے وزٹ کیجئے گرانہ بلاگ۔
