کراچی: میرا پاکستان میرا گھر اسکیم کے تحت فیصل آباد کے لیے کمرشل بینکوں کی 7.4 ارب روپے قرض کی منظوری دے دی۔
اسٹیٹ بینک آف پاکستان کی جانب سے فیصل آباد میں منعقد ہونے والے میرا پاکستان میرا گھر میلے میں عوامی دلچسپی کو سراہتے ہوئے کمرشل بینکوں نے درخواست گزاروں سے آن لائن نظام کے ذریعے 18 ارب روپے کی درخواستیں وصول کیں۔
حکام کے مطابق دو روزہ میلے میں 30,000 سے زائد افراد نے میرا پاکستان میرا گھر اسکیم کے بارے میں معلومات حاصل کرنے اور بینکوں کی ون ونڈو سہولت کے ذریعے قرضوں کے لیے درخواستیں دینے کے لیے شرکت کی۔
اس موقع پر کمرشل بینکوں نے تقریباً 7.4 ارب روپے کے قرضوں کی مشروط منظوری دی۔ میرا پاکستان میرا گھر کے میلے کی افتتاحی تقریب کے موقع پر گورنر اسٹیٹ بینک ڈاکٹر رضا باقر نے کہا کہ اسٹیٹ بینک، حکومت، این اے پی ایچ ڈی اے اور بینکوں کی مسلسل کوششوں کے نتیجے میں قرضوں کے لیے درخواستیں دینے والوں کی تعداد اور ان کی منظوریوں میں مسلسل اضافہ ہو رہا ہے۔
ان کا کہنا تھا کہ کمرشل بینک ہفتہ وار 4.5 ارب روپے کی منظوری اور تقریباً 2.3 ارب روپے قرض کی مد میں تقسیم کر رہے ہیں۔
میرا پاکستان میرا گھر اسکیم کے نتیجے میں سستے مکانات کے قرضوں کے لیے درخواستیں 357 ارب روپے تک پہنچ چکی ہیں جن میں سے 157 ارب روپے کی درخواستوں کی منظوری دی جا چکی ہے اور اب تک 56 ارب روپے کے قرضے تقسیم ہو چکے ہیں۔
میلے میں 25 بینکوں اور 28 تعمیراتی کمپنیوں اور ڈویلپروں نے اسٹال لگائے تھے جبکہ درخواستیں وصول کرنے ای سی آئی بی کلیئرنس کے بعد درخواستوں کی پروسیسنگ قسط کی رقم کا حساب لگانے اور درخواست گذاروں کو مشروط منظوری کے کاغذات دینے کے انتظامات کیے تھے۔
مزید خبروں اور اپڈیٹس کیلئے وزٹ کیجئے گرانہ بلاگ۔
