سی ڈی اے کا ٹینتھ ایونیو پراجیکٹ کے لیے کنسلٹنٹ مقرر کرنے کا فیصلہ

اسلام آباد: کیپیٹل ڈیویلپمنٹ اتھارٹی (سی ڈی اے) نے ٹینتھ ایونیو پراجیکٹ کے لیے کنسلٹنٹ مقرر کرنے کا فیصلہ کرلیا ہے۔

یہ پراجیکٹ 9 کیلومیٹر طویل ہے اور اس کے تکنیکی بڈز آج سے کھولے جائیں گے۔

یہ ایونیو آئی جے پرنسپل روڈ سے شروع ہوگا اور خیابانِ اقبال یعنی مارگلہ روڈ پر ختم ہوگا۔

اس کی تکنیکی بولیوں کا سلسلہ آج سے شروع کیا جائے گا اور چند ہفتوں کے بعد مالی بولیوں کا سلسلہ شروع ہوگا۔

کنسلٹنٹس اس پراجیکٹ کی فیزیبلٹی اسٹڈی کریں گے اور پی سی ون تیار کریں گے۔ اس کام کے لیے چھے ماہ کا وقت مقرر کیا گیا ہے۔

پراجیکٹ حکومتِ پاکستان کے پبلک سیکٹر ڈیولپمنٹ پروگرام کے تحت پورا کیا جائے گا اور اس کے لیے ایک ارب روپے حال ہی میں مختص کیے گئے ہیں۔

اس پراجیکٹ سے آئی جے پی روڈ اور نائنتھ ایوینو پر ٹریفک کا بہاؤ کم ہوگا اور اس کے ساتھ ہی آئی ٹین اور آئی الیون کے لوگ متبادل راستوں سے اندرون شہر آ سکیں گے۔

اسلام آباد کے ماسٹر پلان کے مطابق ہر سیکٹر کے بعد ایک بڑی سڑک کا ہونا ضروری ہے تاکہ دو سیکٹرز میں تفریق کی جا سکے۔ اس کی مثال جی سکس اور جی سیون کے مابین سیونتھ ایوینو کا ہونا ہے۔

سی ڈی اے افسران کا کہنا ہے کہ اتھارٹی کی پوری کوشش ہے کہ پراجیکٹ کو رواں مالی سال میں ہی شروع کیا جائے۔

اُن کا کہنا تھا کہ یہ پراجیکٹ ایک میگا منصوبہ ہے اور اس کی تکمیل میں چند سال لگیں گے۔ ہر سال حکومت کو پی ایس ڈی پی سے رقم مہیا کرنی ہوگی۔

مزید خبروں اور اپڈیٹس کے لئے وزٹ کیجئے گرانہ بلاگ۔