اسلام آباد: سی ڈی اے کا شاہ اللہ دتہ میں سپورٹس انکلیو بنانے کا فیصلہ

اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) نے شاہ اللہ دتہ میں ملٹی پرپز سپورٹس کمپلیکس بنانے کا اعلان کیا ہے۔

تفصیلاتت کے مطابق مجوزہ اسپورٹس انکلیو میں والی بال، راک کلائمبنگ، زپ لائن اور کرکٹ سمیت مختلف کھیلوں کی سہولیات موجود ہوں گی۔ سی ڈی اے کے چیئرمین کے مطابق اس منصوبے کا مقصد اسلام آباد کے رہائشیوں میں کھیلوں اور تفریحی سرگرمیوں کو فروغ دینا اور انہیں عالمی معیار کی سہولیات فراہم کرنا ہے۔

مزید یہ کہ سپورٹس انکلیو سی ڈی اے کی 300 کنال اراضی پر تعمیر کیا جائے گا۔ یہ اراضی ماحولیاتی اور صحت کی سرگرمیوں کے لیے مختص کی گئی ہے۔

غور طلب بات یہ ہے کہ اس کمپلیکس کو ایک کثیر الامقصدی اسٹیڈیم کی طرز پر تیار کیا جائے گا تاکہ کھیلوں کی مختلف سرگرمیوں کو پورا کیا جاسکے۔

سپورٹس کمپلیکس کے علاوہ سی ڈی اے نے سکندر اعظم کے قدیم راستے کو بھی بحال کرنے کا فیصلہ کیا ہے۔ یہ قدیم راستہ شاہ اللہ دتہ کو خیبر پختونخوا سے اسلام آباد کی حدود تک ملاتا ہے۔ اس تاریخی پگڈنڈی کی بحالی سے نہ صرف سیاحت کو فروغ ملے گا بلکہ علاقے کے ثقافتی ورثے کو بھی محفوظ رکھا جائے گا۔

مزید برآں، سی ڈی اے نے ٹریل 8 کو بحال کرنے اور آٹھ بدھ غاروں سے بدھا سٹوپا تک ایک نئی پگڈنڈی بنانے کا بھی منصوبہ بنایا ہے۔

ان پگڈنڈیوں کی بحالی سے قدرت سے محبت کرنے والوں اور پیدل سفر کرنے والوں کو مارگلہ کی پہاڑیوں کی قدرتی خوبصورتی کو دیکھنے کا موقع ملے گا۔

مزید خبروں اور اپڈیٹس کیلئے وزٹ کیجئے گرانہ بلاگ۔