اسلام آباد: کیپیٹل ڈیویلپمنٹ اتھارٹی کو جناح کنوینشن سینٹر میں منعقدہ تین روزہ نیلام عام میں 16 کمرشل پلاٹس کی فروخت پر 27 ارب روپے موصول ہوگئے ہیں۔
نیلام عام کے پہلے دو روز میں اتھارٹی کو 19 ارب روپے کی آمدن ہوئی اور تیسرے روز 8 ارب روپے کی فروخت دیکھنے میں آئی۔
اِس سے قبل جولائی میں منعقدہ نیلامی میں سی ڈی اے نے 17 ارب روپے کی ریکارڈ فروخت کی تھی مگر حالیہ نیلامی میں 27 ارب روپے کی فروخت سے گزشتہ ریکارڈ ٹوٹ گیا۔
ترجمان سی ڈی اے کا کہنا تھا کہ نیلامی کی یہ کامیابی اس بات کی عکاسی کرتی ہے کہ سرمایہ کاروں کو کیپیٹل ڈیویلپمنٹ اتھارٹی کی پالیسیوں اور حکومت کی تعمیراتی صنعت کو دی گئی مراعات پر مکمل اعتماد ہے۔
تین دن کی نیلامی کی کارروائی میں پلاٹوں کے لئے بولی دہندگان کے مابین جوش و خروش دیکھنے کو ملا۔
پہلے دن کے دوران ڈپلومیٹک انکلیو، جی نائن مرکز اور آئی ایٹ مرکز سے پلاٹوں کے لئے بولیاں موصول ہوئیں جبکہ نیلامی کے دوسرے دن بلیو ایریا، سیکٹر جی الیون تھری، ایف ٹین، انڈسٹریل ٹرائینگل کہوٹہ کے پلاٹوں کے لیے بولیاں موصول ہوئیں۔
نیلامی کے تیسرے دن سی ڈی اے کو آئی فورٹین، کلاس تھری شاپنگ سینٹر اور بلیو ایریا کے پلاٹوں کے لئے بولیاں موصول ہوئیں۔
کیپیٹل ڈویلپمنٹ اتھارٹی نے اسلام آباد کے مختلف ترقی یافتہ کاروباری مراکز سے تجارتی پلاٹوں کو نیلامی کے لئے پیش کیا۔
ممبر فنانس سی ڈی اے کی سربراہی میں 10 رکنی کمیٹی نے نیلامی کی کارروائی کی نگرانی کی۔ ممبر اسٹیٹ، ممبر پی اینڈ ڈی، ڈی جی لا، ڈائریکٹر تعلقات عامہ، ڈائریکٹر شہری منصوبہ بندی، ڈائریکٹر ریجنل پلاننگ اور ڈائریکٹر فنانس کمیٹی کے ممبر ہیں۔
سی ڈی اے کا بورڈ بولی کی حتمی منظوری دینے کا مجاز ہوگا۔
مزید خبروں اور اپڈیٹس کے لیے وزٹ کیجئے گرانہ بلاگ۔
