اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) نے اسلام آباد کے ایک ممتاز مقام کو جرمن پاکستانی ہومینسٹ ڈاکٹر روتھ فاؤ کے نام سے منسوب کرنے کا فیصلہ کیا ہے۔
تفصیلات کے مطابق وفاقی ترقیاتی ادارے سی ڈی اے کے چیئرمین نور الامین مینگل نے اپنے حالیہ ٹویٹ میں اس فیصلے سے آگاہ کیا۔ اور ڈاکٹر روتھ فاؤ کو خراجِ تحسین پیش کرنے کے طور پر دارالحکومت اسلام آباد میں ایک نمایاں مقام ان کے نام سے منسوب کرنے کا اظہار کیا۔
واضح رہے کہ ڈاکٹر روتھ فاؤ 1960 میں پاکستان تشریف لانے والی وہ شخصیت ہیں، جنھوں نے اپنا ملک جرمنی چھوڑ کر پاکستان میں کوڑھ (جذام) کے مرض میں مبتلا مریضوں کے لیے نا صرف اپنی خدمات وقف کیں۔ بلکہ تمام عمر اسی جذبے سے سرشار خدمات کرتے ہوئے گزاری۔ اور بالآخر اگست 2017 میں پاکستان کی سرزمین پر ہی اپنے خالقِ حقیقی سے جا ملیں۔
ڈاکٹر روتھ فاؤ کی خدمات کے باعث ہی آج پاکستان میں کوڑھ کا مرض تقریباً ختم ہو چکا ہے۔ یہی وہ عظیم شخصیت ہیں جن کی بدولت پاکستان نے ایشیاء میں سب سے پہلے کوڑھ (جذام) کے مرض پر قابو پایا۔
مزید خبروں اور اپڈیٹس کیلئے وزٹ کیجئے گرانہ بلاگ
